Çinin Quyyan şəhərində boks üzrə Dünya Kuboku davam edir. Mötəbər turnirdə 8 boksçu ilə təmsil olunan Azərbaycan millisi növbəti uğurlu nəticələrə imza atıb.

Düşərgəmizdən ən sevindirici xəbər Alfonso Dominqesdən gəlib. 90 kq çəki dərəcəsində mübarizə aparan təcrübəli boksçumuz bütün rəqiblərini sıradan çıxararaq yarımfinala yüksəlib. Bununla da Dominqes Dünya Kubokunun ən azı bürünc medalını özünə təmin edib.

Komandamızın digər üzvləri də Çində uğurlu yürüşünü davam etdirir. Sübhan Məmmədov (50 kq) və Seyidcamşid Cəfərov (75 kq) inamlı qələbələrlə adlarını 1/4 finala yazdırıblar. Medala bir addım qalan boksçularımız növbəti döyüşə hazırlaşırlar. Amin Məmmədzadə (55 kq) və Məhəmmədəli Aşurəliyev (60 kq) isə rəqiblərinə şans tanımayaraq 1/8 final mərhələsinə vəsiqə qazanıblar.