Premyer Liqanın 25-ci turunda “Araz-Naxçıvan”a minimal hesabla uduzan (0:1) “Şamaxı”nın və milli komandamızın baş məşqçisi Ayxan Abbasov matçın yekunlarını şərh edib. Təcrübəli mütəxəssis doğma meydandakı uğursuzluğun səbəblərinə aydınlıq gətirməklə yanaşı, millidə gözlənilən ciddi islahatların anonsunu verməyi də unutmayıb.
Oyunun gedişatını şərh edən Abbasov, komandasının göstərdiyi futboldan razı qalsa da, nəticənin ədalətsiz olduğunu vurğulayıb: “Bu mövsüm bəlkə də üçüncü və ya dördüncü dəfədir ki, məğlubiyyətə layiq olmadığımız halda meydanı xalsız tərk edirik. Çoxsaylı qol epizodları yaratsaq da, təəssüf ki, son nöqtəni qoya bilmədik. Bu gün rəqibə demək olar ki, real qol vəziyyəti vermədik, qolu da öz qapımıza vurduq. Lakin futbolçularımın son dəqiqəyə qədər mübarizə aparması, geri çəkilməməsi məni sevindirir. “Araz-Naxçıvan“ kimi rəqiblə oyunda üstünlük bizdə idi. İndi əsas vəzifəmiz son ötürmə və zərbələr üzərində daha ciddi çalışmaqdır”.
Millinin sükanı arxasında olan mütəxəssis, “Şamaxı”dan və digər klublardan yığmaya dəvət alacaq gənc oyunçularla bağlı mövqeyini açıqlayıb. O, gənclərin inkişafı üçün oyun praktikasının vacibliyini ön plana çəkib: “Futbolçularımızın böyük hissəsi hazırda gənclər yığmasında çıxış edir. Onların əsas milliyə yüksəlməsini çox istəyirəm, çünki bir çoxu artıq stabil oyun nümayiş etdirir və buna layiqdir. Lakin gənclər yığmasını Portuqaliya və Bolqarıstana qarşı iki çox çətin sınaq gözləyir. Mənim üçün onların əsas milliyə gəlib cəmi 5-10 dəqiqə meydanda olmasındansa, U-21-də Portuqaliyaya qarşı 90 dəqiqə mübarizə aparmaları daha faydalıdır. Buna baxmayaraq, namizədlər siyahımızda yeni adlar var və mart ayındakı ‘FIFA Series’ turnirində həm təcrübəli, həm də debütant futbolçulara şans verəcəyik”.
Qarşıdan gələn beynəlxalq turnirdəki hədəflərdən danışan baş məşqçi, komandanın qarşısına konkret tapşırıq qoyulduğunu bildirib: “Vəzifəmiz hər oyunda maksimum nəticə göstərmək və qələbə qazanmaqdır”.
Mətbuatda səs-küyə səbəb olan “uğursuz nəticələrə görə klub rəhbərləri getməlidir” fikrinə də toxunan A.Abbasov, sözlərinin yanlış anlaşıldığını qeyd edib: “Bəzən sözləri kiməsə qarşı yönəltməyi sevirlər. Mən hər zaman jurnalistlərə hörmətlə yanaşmışam. Əgər həmin mətbuat konfransına diqqətlə baxsanız, görərsiniz ki, mən sadəcə beynəlxalq təcrübədən nümunə gətirmişəm. Dünyada belə bir praktika var: nəticə olmayanda təkcə məşqçilər yox, rəhbərlik də məsuliyyət daşıyır və istefa verir. Mən konkret heç kimi nəzərdə tutmamışam, sadəcə bizim futbol mühitində də bu cür peşəkar yanaşmanın olmasının vacibliyini vurğulamışam”.