Florentino Peres yenidən İspaniya futbolunun “ilahı” rolunu oynamaq qərarına gəlib. Bu dəfə onun maniakal hədəf-nişangahında “Barselona”nın gənc ulduzu Pedri var. Amma görünən odur ki, qurulan bu səs-küylü tamaşada iştirak etməyə ən az həvəsi olan elə Pedrinin özüdür.

Jurnalist Siro Lopes və “El Desmarque” portalının iddiasına görə, “Real”ın prezidenti 2027-ci il üçün möhtəşəm bir “xəyanət ssenarisi” cızır. Məqsəd bəllidir: Luis Fiqu transferinin yaratdığı o tarixi sarsıntını yenidən yaşatmaq. Lakin don Florentinonun öz “Napoleon planları”nda görməzdən gəldiyi kiçik, amma keçilməz bir detal var: 1 milyard avroluq sərbəstqalma məbləği və 2030-cu ilə qədər davam edən rəsmi öhdəlik.

Fiqu Erası Geridə qaldı: 60 milyonluq “çaypulu”

İspaniya mətbuatının istinad etməyi sevdiyi Fiqu hadisəsi tamamilə başqa bir dövrün hekayəsi idi. O zaman Fiqu “Barselona”da özünü kənarda qalmış hiss edirdi, agenti isə prezident seçkiləri fonunda hər iki klub arasında ustalıqla “ikili oyun” qururdu. Üstəlik, o vaxtkı 60 milyon avroluq sərbəstqalma məbləği bugünkü transfer bazarında sanki lüks bir restoranda ödənilən “çaypulu” təsiri bağışlayır.

Futbol yox, xalis eqo davası

İndi isə qarşımızda kiçik ölkələrin ÜDM-i ilə yarışan rəqəmlər və klubuna can-başla bağlı olan bir futbolçu dayanıb. Lakin görünür, Peresi bu cür “xırdalıqlar” dayandırmır. Çünki burada məqsəd heyəti gücləndirmək deyil, rəqibə sarsıdıcı zərbə vurmaqdır. Bu, futbol yox, xalis eqo davasıdır. Qələbənin kuboklarla deyil, rəqibə verilən ağrı ilə ölçüldüyü bir meydan oxumadır.

Peresə Pedri “oyunçu” kimi lazım deyil — onsuz da sərəncamında Bellinqem, Valverde və Kamavinqa kimi ulduzlar var. Ona Pedri bir simvol kimi lazımdır. “Real”ın istənilən adamı, hətta “Barselona”nın qəlbi sayılan birini belə qoparıb apara biləcəyinin canlı sübutu kimi…

Məntiqin bitdiyi nöqtə

Problem ondadır ki, bu məntiq futbolun hələ astronomik maliyyə sirkinə çevrilmədiyi 2000-ci illərdə işləyirdi. 2019-cu ildən bəri 227 matçda tər tökən, uşaqlıqdan bu rənglərə aşiq olan birini xəyanətə razı salmaq? Bu, dünyanın heç bir sərvəti ilə həll olunmayacaq qədər ağır bir yükdür.

Lakin İspaniya futbolundakı bu çılğınlıq dövranı dayanmaq bilmir. Görünən odur ki, bu sonsuz səs-küyü nə sağlam düşüncə, nə də reallıq hissi susdura biləcək.