“Speedline”ın verdiyi məlumata görə, Amerikanın yayım nəhəngi FOX Sports, “Əl-Nəsr”in hücumçusu Kriştiano Ronaldo ətrafında yaranan səs-küylü vəziyyət fonunda Səudiyyə Pro Liqası ilə əməkdaşlığı dayandırıb.

Qeyd olunur ki, bu tərəfdaşlıqdan imtina çempionatın qlobal media və biznes ambisiyalarına ciddi zərbə vurub. Mənbənin bildirdiyinə görə, liqanın beynəlxalq yayım hüquqları və marketinq sahəsindəki ümumi maliyə itkiləri artıq təxminən 2,4 milyard dollara çatıb.

Bundan əvvəl Ronaldo ardıcıl ikinci oyunu buraxıb. ESPN-in məlumatına görə, 40 yaşlı portuqaliyalı ulduz Səudiyyə Ərəbistanı Dövlət İnvestisiya Fondunun klub rəhbərliyindəki dəyişikliklərlə bağlı zəmanət verməməsi səbəbindən oyunları boykot edir. Mənbələr qeyd edir ki, yaxın həftələrdə bu təminatlar verilməsə, futbolçu yayda komandanı tərk edə bilər.

Xatırladaq ki, Ronaldo 2023-cü ilin yanvarından “Əl-Nəsr”də çıxış edir. Cari mövsümdə o, bütün turnirlərdə 22 matça çıxıb, 18 qol vurub və 3 məhsuldar ötürmə edib.