UEFA Çempionlar Liqasının 3-cü təsnifat mərhələsinin cavab oyununda “Şkendiya”nı qəbul edəcək “Qarabağ”ın baş məşqçisi Qurban Qurbanov ənənəsinə sadiq qalaraq rəqib haqqında ehtiyatlı danışdı. İlk oyunda qələbəyə baxmayaraq Qurbanov rəqibin iddialı olduğunu və döyüşkən futbol oynadıqlarını xatırladıb: “Çox intizamlı oynamağa çalışmalıyıq. Futbolçularla danışmışıq. Yaxşı, maraqlı oyun olacaq. Hər iki komanda ilk oyunun nəticəsinə görə qalib gəlməyə layiqdir. Bizim az da olsa üstünlüyümüz var, irəlidəyik”.
Qurbanov qələbəyə rəğmən cavab oyunu öncəsi də “Şkendiya” haqqında fikirlərini dəyişmədiyini təsdiqləyib: “Hamı düşünürdü ki, FKSB qalib gələcək, amma “Şkendiya” qələbə qazandı. Öz döyüşkənliyi və xarakteri ilə bunu bacardılar. Meydanda da şahid olduq. Təəssüratlarım eyni oldu. Sabah çox mobil komanda olmalıyıq. Bərk durmağı bacarmalıyıq”.
Mətbuat konfransının gedişini “Qarabağ”ın iki oyunçusu Kadi Borges və Emmanuel Addai də müzakirə predmeti oldu. Jurnalsitin Kadinin ilk oyunda “intizamsız və istəksiz” oynaması fikri ilə razılaşmayan Qurbanov rəqibin gücünü də nəzərə almağı və ümumən Avropa futbolunda top itkilərinin artdığını bildirib. Addainin “rejimə riayət etməməsi və qidasına fikir verməməsi” haqqında iddialara isə Qurbanov daha maraqlı cavab verib: “O, fərqli bir rejimdən Azərbaycan mətbəxinə düşüb. Bizim yeməklər həqiqətən çox dadlıdır və o da bu yeməklərə həvəsli olur. Kiçik cərimələr də etmişik. Amma son vaxtlar hər şey qaydasındadır. Özüm də bu yolu keçmişəm. İnsanın iştahı artanda yaxşı yeməklər yemək istəyir. Dəyişiklik çox olub, ciddi problem deyil. Çox şey yaxşılığa doğru gedir”.