Lionel Messinin sahibi olmağa hazırlaşdığı İspaniyanın “Eldense” klubu artıq argentinalı ulduzun təsirini hiss etməyə başlayıb.

İspaniyanın “AS” nəşrinin məlumatına görə, Messinin Alikante təmsilçisinin səhmlərinin 100 faizini almaq üçün ilkin razılaşma əldə etməsindən cəmi 48 saat sonra kluba sponsorluq etmək istəyən şirkətlərin sayı artıb. Ümumilikdə 11 brend “Eldense” ilə mümkün əməkdaşlıq variantlarını nəzərdən keçirir.

Onlardan 6-sı artıq cari mövsümdən etibarən kluba sponsorluq etmək üçün danışıqlara başlayıb. Bununla belə, Messi ilə bağlı razılaşma hələ rəsmiləşməyib. Səhmlərin ötürülməsi üçün bir sıra tələblərin yerinə yetirilməsi və İspaniya İdman Şurasının (CSD) müvafiq icazəsi tələb olunur.

Maraqlıdır ki, həmin şirkətlərin bir neçəsi Messi ilə fərdi sponsorluq müqavilələrinə də malikdir. Argentinalı futbolçunun sahibi olduğu “Kornelya” klubu da bu mövsüm forma sponsorunu dəyişərək “Adidas”la əməkdaşlığa başlayıb. “Eldense”nin formasını isə hazırda ötən mövsümdən əldə olunmuş razılaşmaya əsasən “Hummel” hazırlayır.

Messinin klubun sahibi olacağı ilə bağlı xəbərin yayılması “Eldense”nin digər reklam imkanlarına da marağı artırıb. Klubun televiziya yayımındakı bəzi reklam sahələri bu həftə artıq şirkətlərin diqqətini cəlb edib və boş yerlərin bir hissəsi doldurulmağa başlanıb.

Messi kimi dünya futbolunun ən tanınmış simalarından birinin adının “Eldense” ilə əlaqələndirilməsi klubun kommersiya dəyərini əhəmiyyətli dərəcədə artırır. Nəşrin qənaətinə görə, bu təsir hətta anlaşma rəsmiləşdirilməmişdən əvvəl özünü göstərməyə başlayıb.

Argentina ilə DÇ-2022-nin qalibi olan Messinin “Eldense”in səhmlərinin 100 faizini əldə etməsi baş tutarsa, klubun həm idman, həm də kommersiya baxımından yeni mərhələyə qədəm qoyacağı gözlənilir.