UEFA Avropa Liqasının II təsnifat mərhələsinə yüksəlməyə yaxın olan “Qarabağ”ın növbəti rəqibi müəyyənləşib. Şimali İrlandiyada “Derri Siti”nin qonağı olan Bolqarıstanın ÇSKA (Sofiya) klubu gərgin keçən matçda 2:1 hesablı qələbə qazanıb. İlk görüşdə də rəqibini üstələyən (3:2) bolqarlar, iki oyunun nəticəsinə əsasən ümumi 5:3 hesabı ilə mərhələ adlayaraq Ağdam klubuna rəqib olublar.

Derridəki qarşılaşma qonaq azarkeşlərin yaratdığı kütləvi iğtişaşla yadda qalıb. ÇSKA fanatları qoruyucu sədləri qıraraq ailə sektoruna hücum ediblər. Nəticədə azyaşlılar təhlükəsizlik məqsədilə yaşıl meydançaya qaçmaq məcburiyyətində qalıblar.

Bu insident səbəbindən baş hakim matçı dayandırıb və futbolçular paltardəyişmə otağına yollanıb. İrlandiya mətbuatı qonaqların bu hərəkətini “tam biabırçılıq” adlandıraraq sərt şəkildə qınayıb.

Yaranmış uzunmüddətli fasiləyə görə referi ikinci hissəyə düz 20 dəqiqə əlavə edib. MOİK qələbəni məhz bu uzatma dəqiqələrində qoparıb. Qarşılaşmada hesabı 47-ci dəqiqədə meydansahiblərindən Ellis Çepmen açsa da, 75-ci dəqiqədə İoannis Pittas status-kvonu bərpa edib. Matçın 90+18-ci dəqiqəsində isə “Derri Siti”nin oyunçusu Barri Kotterin öz qapısına vurduğu qol sayəsində Sofiya təmsilçisi 2:1 hesablı qələbəyə sevinib