Bakıda təlim-məşq toplanışında olan gənclərdən ibarət yığmamız (U-17) yoxlama oyunu çərçivəsində növbəti matçına çıxıb. Aqil Nəbiyevin yetirmələri paytaxtda Tacikistanın müvafiq yaş qrupundan olan komandası ilə ikinci dəfə qüvvəsini sınayıb.

AFFA-nın məlumatına görə, qarşılıqlı qollarla zəngin olan olduqca gərgin və dramatik mübarizə şəraitində keçən qarşılaşma yeniyetmə futbolçularımızın 3:2 hesablı qələbəsi ilə başa çatıb. Millimizin heyətində Rəsul Balakişiyev, Daniil Rəcəbov və Ruslan Abılov rəqib qapısına yol taparaq komandaya qələbə qazandıran qolların müəllifi olublar.

Bu qələbə komandamız üçün həm də revanş xarakteri daşıyıb. Belə ki, bu rəqiblər arasında Bakı toplanışı çərçivəsində baş tutan ilk qarşılaşma qonaqların minimal hesablı (1:0) qələbəsi ilə yekunlaşmışdı. İkinci görüşdə səhvlərini düzəldən və hücumda daha kəsərli oynayan U-17 millimiz, toplanışı qələbə notları ilə davam etdirməyi bacarıb.