Özbəkistanın paytaxtı Daşkənd şəhərində azərbaycanlı qrossmeyster Şəhriyar Məmmədyarovun da qatıldığı beynəlxalq şahmat turniri davam edir.

​Yarışın əsas mərhələsində ümumilikdə 10 şahmatçı mübarizə aparır. Məmmədyarovun rəqibləri arasında Nodirbek Abdusattorov (Özbəkistan), Yan Nepomnyaşiy (Rusiya), Santoş Vidit və Arjun Eriqaisi (hər ikisi Hindistan) kimi tanınmış qrossmeysterlər var.​Bu gün keçirilən 4-cü turda Məmmədyarov ABŞ təmsilçisi Hans Moke Nimanla heç-heçə edib.

​Qrossmeysterimiz daha əvvəl Viditə qalib gəlib, Eriqaisi ilə heç-heçə oynayıb və Abdusattorova məğlub olub.

Hesabında 2 xal olan Məmmədyarov hazırda 6-cı pillədə qərarlaşıb.

​Turnirin “Challengers” qrupunda isə iki şahmatçımız – Eltac Səfərli və Məhəmməd Muradlı çıxış edir. 

​Məhəmməd Muradlı hər iki partiyada qələbə qazanaraq 3,5 xalla turnir cədvəlinə başçılıq edir.

​Eltac Səfərli bir oyunda heç-heçə edib, digərində isə məğlub olub. Hazırda 1 xalı olan Səfərli sonuncu yerdədir.

Ümumi mükafat fondu 121 500 dollar təşkil edən yarış dairəvi sistem üzrə keçirilir və 9 turdan ibarətdir. Beynəlxalq turnir iyunun 15-də başa çatacaq.