San-Marino millisinin baş məşqçisi Roberto Çevoli bu gün Macarıstanın Sombatxey şəhərində millimizə qarşı keçiriləcək yoldaşlıq oyunu öncəsi fikirlərini bölüşüb. San-Marino Futbol Federasiyasının mətbuat xidmətinə istinadən xəbər veririk ki, mütəxəssis komandasının gözləntilərindən və hədəflərindən danışıb.
Çevoli rəqib fərqi qoymadan hər matça qələbə üçün çıxdıqlarını vurğulayıb: “Futbolçular Banqladeşlə oyunda (1:2) qələbə qazanmaq istəyirdilər. Bu çılğın qələbə istəyi bəzi anlarda diqqətsizliyə səbəb oldu və nəticəyə təsir etdi. Lakin biz bu məğlubiyyətdə də müsbət məqamlar görürük. Bu, oyunçuların potensiallarına olan inamının və gözləntilərinin artdığını göstərir. Banqladeşlə oyundakı təcrübədən maksimum yararlanmağa və Azərbaycanla görüşdə ən yaxşı oyunumuzu nümayiş etdirməyə çalışacağıq. Komandamdan meydanda ciddi xarakter gözləyirəm. Nəticədən asılı olmayaraq, uşaqların bu reaksiyanı verəcəyinə əminəm”.