Tbilisidə keçirilən Avropa çempionatında 60 kq çəki dərəcəsində mübarizə aparan Balabəy Ağayevin yarımfinalda Gürcüstan təmsilçisi Qiorqi Sardalaşviliyə məğlubiyyəti böyük müzakirələrə səbəb olub. İdmançımızın məşqçisi Şümşad Bəhramov qarşılaşmanın gedişatına təsir edən hakim qərarlarını kəskin tənqid edib.

Məşqçi Ağayevin turnirə mükəmməl formada gəldiyini, lakin aşkar ədalətsizliklə üzləşdiyini bildirib: “Tam məsuliyyətimlə deyirəm ki, Balabəy bu Avropa çempionatında özünün pik formasında idi. Yarımfinalda isə biz açıq-aşkar ədalətsizliklə qarşılaşdıq. Sardalaşviliyə ‘vaza-ari’ xalının verildiyi epizodda, nəinki ‘vaza-ari’, heç ‘yuko’dan belə söhbət gedə bilməzdi. Çünki həmin anda rəqib tərəfindən heç bir nəzarət və ya fənd tətbiqi yox idi”.

Bəhramov qeyd edib ki, ədalətli hakimlik olsaydı, Balabəy bu gün çempionluq kürsüsünə qalxacaqdı: “İdmançımıza görə çox üzgünəm. Ola bilsin ki, cüdo tarixi hələ belə xal verilməsi görməyib. Hesab edirəm ki, Ağayevi birbaşa qızıl medaldan məhrum etdilər. Mən onun finalda da qələbə qazanacağına tam inanırdım”.

Məşqçi həmçinin idmançının psixoloji durumuna toxunaraq, bürünc medal şanslarını dəyərləndirib: “Ümid edirəm ki, o, bürünc medalı qazanmağı bacaracaq. Balabəy fiziki olaraq çox güclüdür, sadəcə bu haqsızlıqdan sonra özünü psixoloji cəhətdən toparlamalı və yenidən mübarizəyə köklənməlidir”.