“SportoweFakty” nəşrinin məlumatına görə, Polşa millisinin məşqçi heyəti “Sabah”ın müdafiəçisi Timoteuş Puxaçı diqqətdə saxlayırlar. UEFA Çempionlar Liqasında “Mançester Yunayted”ə 0:4 hesabı ilə məğlub olduqları matçda təmsilçimizin heyətində 90 dəqiqə meydanda olan 27 yaşlı futbolçu, oyundan sonra yığmasının əməkdaşları ilə əlaqə saxladığını bildirib.

Güclü rəqibə qarşı çıxış etmək imkanı qazanan Puxaç polşalı mütəxəssislərin diqqət mərkəzində olmasından məmnunluğunu gizlətməyib: “Mənimlə əlaqə saxladılar, hazırda diqqətlə izlənilirəm. Bu, çox sevindirici haldır. ‘Old Trafford’da məni canlı izləmək üçün kiminsə olub-olmadığını dəqiq bilmirəm, amma fikrimcə, yaxşı təsürat bağışladım”.

Polşa millisinin sentyabr-oktyabr toplanışı  yaxınlaşır. Millətlər Liqasının növbəti matçları üçün heyətə dəvət edilən futbolçuların siyahısı sentyabrın 18-də açıqlanacaq.

Polşalıları qarşıda dörd vacib qarşılaşma gözləyir: komanda Bosniya və Herseqovina (25 sentyabr, 5 oktyabr), İsveç (28 sentyabr) və Rumıniya (2 oktyabr) seçmələri ilə üz-üzə gələcək.