Azərbaycan Badminton Federasiyasının rəhbərliyi Danimarkanın Horsens şəhərində keçirilən Avropa Badminton Konfederasiyasının (EKC) illik ümumi yığıncağında iştirak edib. Tədbir çərçivəsində təşkilatın rəhbər orqanlarına keçirilən seçkilər ölkəmiz üçün əlamətdar nəticə ilə yekunlaşıb.

Olduqca gərgin və rəqabətli mühitdə keçən seçkilərdə Azərbaycan Badminton Federasiyasının prezidenti Taleh Ziyadov böyük uğura imza atıb. O, səsvermənin nəticələrinə əsasən, 2026–2030-cu illər müddətinə Avropa Badminton Konfederasiyasının Direktorlar Şurasının üzvü seçilib.

Qeyd edək ki, Direktorlar Şurasındakı 3 vakant yer uğrunda Avropanın müxtəlif ölkələrini təmsil edən 8 namizəd mübarizə aparıb. Qurumun 50 üzvündən 47-sinin iştirak etdiyi səsvermədə Taleh Ziyadovun namizədliyinin dəstəklənməsi Azərbaycanın beynəlxalq idman arenasında artan nüfuzunun və son illər bu idman növünün ölkəmizdəki inkişafına verilən yüksək qiymətin göstəricisidir.

Bu təyinat növbəti dörd il ərzində Azərbaycanın qitə badmintonunun idarəedilməsində və strateji qərarların qəbulunda yaxından iştirakını təmin edəcək. Bu həm də yerli idmançılarımızın beynəlxalq təcrübə qazanması və ölkəmizdə badmintonun kütləviliyinin artırılması istiqamətində yeni imkanlar açır.