Şotlandiya Premyer Liqasında mövsümün çempionluq düyünü son turda, özü də birbaşa dueldə çözülüb. Azarkeşlərin qısaca “Harts” adlandırdığı “Hart of Midlotian” klubu, “Seltik” və “Reyncers”in ölkə futbolundakı çoxillik hegemonluğuna son qoymağa çox yaxın olsa da, yekunda möcüzə baş verməyib.

Hər şey “Seltik Park”da baş tutan dramatik final matçında bəlli olub. Qızıl medallar üçün mütləq qələbə qazanmalı olan meydan sahibləri doğma azarkeşlər önündə gərgin keçən qarşılaşmadan 3:1 hesablı qələbə ilə ayrılmağı bacarıblar.

Uzun müddət turnir cədvəlinə başçılıq edən “Harts” isə bu məğlubiyyətlə 1960-cı ildən bəri davam edən ilk çempionluq həsrətinə son qoymaq şansını əldən verib. Beləliklə, mövsüm ərzində üç fərqli baş məşqçi ilə işləyən və xeyli xal itkiləri yaşayan “Seltik”, dramatik finiş sayəsində “Harts”ı iki xal qabaqlayaraq növbəti dəfə çempionluq kubokunu başı üzərinə qaldırıb.

Qarşılaşmadan sonra “Sky Sports”a danışan “Seltik”in kapitanı Kallum Makqreqor duyğularını gizlətməyib:”Şansımızın olduğunu bilirdik və sona qədər döyüşməyə davam etdik. Biz həqiqətən xüsusi bir komandayıq, bu kollektivlə fəxr edirəm”.

Xatırladaq ki, Şotlandiya futbolunda iki nəhəngin — “Seltik” və “Reyncers”in hegemonluğunu qıran sonuncu komanda əfsanəvi ser Aleks Ferqyusonun rəhbərlik etdiyi “Aberdin” olub (1985). “Harts”ın bu uğursuzluğundan sonra qocaman krallıqdakı 41 illik “ikitirəlik” ənənəsi toxunulmaz qalıb.