Gələcəyi barədə danışan Joze Mourinyo “Real” iddialarını təkzib etd və masada yeni müqavilənin olduğunu söyləyib. Dünya futbolunun ən xarizmatik və qalmaqallı məşqçilərindən olan Mourinyo gələcək karyerası ilə bağlı səssizliyini pozub. Təcrübəli mütəxəssis mətbuatda geniş əks-səda doğuran və onun yenidən “Real”ın sükanı arxasına keçəcəyi ilə bağlı yayılan xəbərlərə aydınlıq gətirib.

“Kral Klubu”na qayıdacağı barədə iddiaları təkzib edən portuqaliyalı çalışdırıcı, hazırda İspaniya nəhəngi ilə heç bir rəsmi danışıq aparmadığını qətiyyətlə vurğulayıb. Bununla belə, portuqaliyalı strateq gələcək planlarından danışarkən karyerasını ölkəsində davam etdirə biləcəyinin siqnalını verib. “Special One” (Xüsusi biri),  böyük hörmət bəslədiyi “Benfika” rəhbərliyindən müqavilə müddətini uzatmaq barədə rəsmi təklif aldığını bəyan edib.

Xatırladaq ki, “Benfika” geridə qalan mövsümü məğlubiyyətsiz başa vursa da, turnir cədvəlində yalnız 3-cü yeri tutub. Gələcəyə nikbin baxdığını gizlətməyən Mourinyonun növbəti dayanacağının hara olacağı isə hələ də böyük maraq və qeyri-müəyyənlik doğurur.