Kriştianu Ronaldo karyerasında növbəti ağrılı məğlubiyyətlərdən birini yaşayıb. Portuqaliyalı superulduzun çıxış etdiyi “Əl-Nəsr” Asiya Çempionlar Liqasının finalında Yaponiya “Qamba Osaka”sına minimal hesabla uduzub. Matçın başa çatdığını bildirən fitdən dərhal sonra ulduz futbolçunun nümayiş etdirdiyi davranışlar isə böyük rezonans doğurub və idman ictimaiyyətinin ciddi narazılığına səbəb olub.
Bu, Ronaldo üçün “Əl-Nəsr” forması altında növbəti məyusedici final oyunudur. Belə ki, portuqaliyalı hücumçu Səudiyyə Ərəbistanına köçdüyü vaxtdan bəri rəsmi turnirlərdə artıq dördüncü finalında məğlubiyyət acısı dadır. Klubun böyük investisiyalarına və yüksək gözləntilərə rəğmən, Ronaldo hələ də “Əl-Nəsr”lə heç bir böyük və nüfuzlu titula sahib çıxa bilməyib. Onun Səudiyyə Ərəbistanı karyerasındakı yeganə uğuru 2023-cü ildə qazanılmış Ərəb Klublarının Çempionlar Kuboku olaraq qalır. Ronaldo üçün uğursuzluq zolağına son qoymaq şansı mayın 21-də yaranacaq.
Səudiyyə Ərəbistanı Pro Liqasının sonuncu turunda “Əl-Nəsr” “Damak” komandası ilə qarşılaşacaq. Bu oyunda ölkə çempionluğu və Ronaldonun Səudiyyə Ərəbistanındakı ilk rəsmi çempionluq titulu həll oluna bilər. Hazırda komanda üzərindəki təzyiq maksimum həddədir, çünki bu oyundakı xal itkisi birbaşa rəqib “Əl-Hilal”ın çempionluq yolunu aça bilər.