Bolqarıstanın Samokov şəhərində keçirilən yeniyetmələrin (U-17) Avropa birinciliyinə yekun vurulub. Yarışın son günündə Azərbaycanın sərbəst güləş yığması aktivinə daha iki medal yazdırıb.

Xalçaya çıxan təmsilçilərimizdən İbrahim Həsənov (51 kq) bütün rəqiblərinə qalib gələrək fəxri kürsünün ən yüksək pilləsinə qalxıb və Avropa çempionu tituluna sahib olub.

Digər pəhləvanımız Tunar Həsənov (45 kq) isə bürünc medal uğrunda həlledici görüşü qələbə ilə başa vuraraq yarışı üçüncü pillədə tamamlayıb.

Milli komandamızın digər üzvü Elgün Kərimli (92 kq) də bürünc medal qazanmağa yaxın olsa dı, həlledici qarşılaşmada rəqibinə məğlub olaraq turniri 5-ci sırada bitirib.

Bu nəticələrdən sonra Azərbaycan millisi Avropa birinciliyini ümumilikdə 15 medalla başa vurub. Yeniyetmə güləşçilərimiz vətənə 4 qızıl, 4 gümüş və 7 bürünc medalla qayıdırlar.