Premyer Liqada 29-cu turun həyəcanı davam edir. İkinci oyun gününün açılış matçında “Şamaxı” öz meydanında Gəncənin “Kəpəz” klubunu qəbul edib.
Şamaxı şəhər stadionunda keçirilən qarşılaşma gərgin və maraqlı mübarizə ilə yadda qalıb. İlk hissədə tərəflərin cəhdlərinə baxmayaraq, hesab açılmayıb və komandalar fasiləyə qolsuz bərabərliklə yollanıblar.
Oyunun taleyi ikinci yarıda həll olunub. Ayxan Abbasovun yetirmələri təzyiqi artıraraq 68-ci dəqiqədə istəklərinə nail olublar. Rikardu Apolinario dəqiq zərbə ilə “Şamaxı”nı önə keçirib.
Buraxılan qolun şokundan ayılmağa çalışan “Kəpəz” daha bir zərbə alıb. Cəmi 7 dəqiqə sonra, matçın 75-ci dəqiqəsində Andrey Tırkovyanu rəqib qapısına yol taparaq fərqi iki topa çatdırıb – 2:0. Qalan dəqiqələrdə Azər Bağırovun komandasının cəhdləri nəticəni dəyişmək üçün kifayət etməyib.
ŞAMAXI – KƏPƏZ 2:0 (0:0)
Qollar: Apolinario, 68 (1:0), Tırkovyanu, 75 (2:0)
Baş hakim: Rəşad Əhmədov.
“Şamaxı”: Rikardu Fernandeş, Arsen Ağcabəyov (k), Andrey Tırkovyanu (Alfons Msanqa, 81), Rüfət Abbasov, Rikardu Apolinario, Sezar, Oruc Məmmədov, David Santos, Kərim Rossi (Rodrigo Fernandeş, 81), Dioqu Balau, Abdulla Rzayev (Rəfael Məhərrəmli, 67).
“Kəpəz”: Yusif İmanov, Rauf Hüseynli (Ümid Səmədov, 81), Renosuke Ohori, Fərid Nəbiyev, Rəhman Hacıyev, Paçu, Olavale Onanuqa (Ehtiram Şahverdiyev, 81), Şakir Seyidov, Adama Fofana, Mate Abuladze, Dioqo Verdaşka (k).
Sarı vərəqələr: Hüseynli, 4. Paçu, 21. Seyidov, 28. Məmmədov, 37. Apolinario, 71. Sezar, 90. Nəbiyev, 90+2.