Finalın favoritinin “Sabah” olması heç kimdə şübhə doğurmurdu. “Bayquşlar” parlaq mövsüm nəticəsində vaxtından əvvəl ölkə çempionu olmaqla yanaşı keçirdiyi bütün oyunlarda çox yaxşı təsir bağışlayırdı. “Zirə” isə favorit sayılmasa da, Rəşad Sadıqovun qurduğu özünəməxsus taktika və stabillik, xüsusən də güclü müdafiə sisteminin olması finalın “Sabah” üçün asan olmayacağından xəbər verirdi. Oyunun əvvəli ssenarinin məhz bu cür olacağını göstərdi. “Zirə” türk ulduzu Erenin erkən qolu ilə “bayquşlar”ı şoka saldı. Bundan sonra Valdas Dambrauskasın yetirmələri təşəbbüsü ələ alaraq durmadan hücumlar qurmağa başladılar. Lakin “Zirə” müdafiəsi etibarlı oynayırdı, qapıçı Tyaqo Silva isə ən yaxşı oyunlarından birini keçirirdi.
İkinci hissə də eyni məcrada davam etdi. Lakin artıq neçənci dəfədir ki, Valdas Dambrauskas əvəzetmələrdə usta olduğunu göstərdi. Onun meydana buraxdığı iki futbolçu Daşdəmirov və Mbina cəmi 1 dəqiqə sonra cavab topunu təşkil etdi. Xüsusən də Mbinanın qayçıvari tullanışla vurduğu qol baxımlı alındı. Bundna sonra da mənzərə dəyişmədi. “Sabah” hücum edir, “Zirə” isə təmkinlə müdafiə olunurdu. Artıq hər kəs əlavə vaxta hazırlaşdığı bir vaxtda çempionatın bombardiri Mikkels səhnəyə çıxdı və növbəti dəfə fərdi ustalıq nümayiş etdirərək uzun reydini qola çevirməklə komandasına qızıl dublu qazandırdı.
“Sabah” mövsümü major notda bitirdi. “Zirə” isə Avropa kuboklarına gedən yolda işini çətinləşdirdi. Bununla belə Rəşad Sadıqov və komandası alqışa layiqdir. Hər iki turnirdə son ana qədər mübariz və döyüşkən komanda yaratmaqla həm çempionatda, həm də kubokda intriqanı qüvvədə saxlayan bir komanda rolunu oynadılar.
Ölkə Kuboku, final
“Sabah” – “Zirə” 2:1
Qollar: Eren Aydın, 4 (0:1). Mbina, 70 (1:1). Mikkels, 90+4 (2:1).
“Sabah”: Stas Pokatilov (k), Stiv Solve, İqor Noqeyra, Amin Zedadka, Timoteuş Puxaç (Rəhman Daşdəmirov, 69), Umarəli Rahmonəliyev, İvan Lepinitsa, Aleksey İsayev (Patrik Mbina, 69), Aaron Maluda (Kahim Pərris, 88), Velko Simiç, Coy-Lans Mikkels.
“Zirə”: Tyaqu Silva, Ruan Renato, Anje Musinzi, Stefan Akka (Leroy Mikkels, 90+2), Qismət Əliyev (k), İssa Cibrilla (Elçin Əlicanov, 56), Quima (Ceyhun Nuriyev, 82), Ayron Qomis, Brahim Konate (İsmayıl İbrahimli, 83), Eren Aydın (Junior Martins, 56), Davit Volkov.