“Qəbələ”nin yeni transferi Seydina Keyta klubun rəsmi saytına müsahibə verib. Təcrübəli seneqallı müdafiəçi komandadakı ilk təəssüratlarını və transferinin pərdəarxası məqamlarını bölüşüb:

Qəbələdə infrastruktur çox yüksək səviyyədədir

 “İlk növbədə komandadakı mühiti və infrastrukturu qeyd etmək istərdim. Gördüyüm qədərilə Qəbələdə şərait çox yaxşıdır. Səhhətimlə bağlı bəzi problemlərə görə oyunlara tam hazırlaşa bilməsəm də, belə peşəkar mühitdə yüksək performans göstərməyin mümkün olduğuna inanıram”.

Azərbaycan futboluna bələd idim

“Azərbaycan futbolu haqqında məlumatım var idi. ‘Qarabağ’ın Çempionlar Liqasındakı demək olar ki, bütün oyunlarını izləmişəm. ‘Qəbələ’ barədə isə hələ gəlməmişdən öncə məlumatlı idim. Çünki komandanın əfsanəvi futbolçularından biri olan Dodo ilə Latviyanın ‘Liepaya’ klubunda bir yerdə oynamışıq. O, mənə “Qəbələ” haqqında çox danışmışdı, hətta onun vaxtilə avrokuboklarda çıxış etdiyi oyunları da izləmişdim. Buna görə də təklif gələndə əlavə araşdırmaya ehtiyac duymadım. Mənim üçün əsas məqsəd gəldiyim klubda müsbət iz qoymaqdır”.

Azarkeşlərə çağırış: “Hər şey yaxşı olacaq”

Sonda azarkeşlərə müraciət edən Keyta, onları komandaya dəstək olmağa çağırıb: “Hazırda klub çətin dövrdən keçir və bu vəziyyətdə azarkeş dəstəyi bizim üçün hər şeydən vacibdir. Söz verirəm ki, hər şey yaxşı olacaq. Biz əlimizdən gələnin ən yaxşısını etmək üçün buradayıq və birlikdə uğurlu nəticələr qazanacağımıza inanıram”.