Dünya çempionatında ədaləti qorumalı olan somalili hakim Ömər Artanın başına gələnlər ölkəsində və qitə futbolunda böyük rezonans doğurub. Somalinin Gənclər və İdman Nazirliyi məsələ ilə bağlı rəsmi açıqlama yayaraq, idman ictimaiyyətini sarsıdan hadisənin təfərrüatlarına aydınlıq gətirib.

Ömər Əbdülqadir Artan FİFA-nın ABŞ, Kanada və Meksikanın birgə ev sahibliyi edəcəyi dünya çempionatı üçün seçdiyi 52 elit referi arasında yer alırdı. Ali futbol qurumu onun xidmətlərini yüksək qiymətləndirirdi; təsadüfi deyil ki, somalili ədalət təmsilçisi ötən il Afrikanın ən yaxşı hakimi adına layiq görülmüşdü.

Lakin bu uğurlara baxmayaraq, o, karyerasının ən vacib turnirindən — mundialdan kənarda qalacaq. Diplomatik pasporta sahib olmasına rəğmən, ABŞ hakimiyyəti referinin ölkəyə girişinə qadağa qoyub.

Məsələyə münasibət bildirən FİFA isə neytral mövqe nümayiş etdirərək vəziyyətdən uzaqlaşmağa üstünlük verib. Qurumun bəyanatında qeyd olunub ki, viza və ölkəyə girişlə bağlı bu cür qərarlar birbaşa ev sahibi dövlətin suveren səlahiyyətlərinə daxildir və federasiya buna müdaxilə edə bilməz.

Somalinin Gənclər və İdman Nazirliyinin baş müşaviri, milli komandanın sabiq kapitanı İsse Aden Abşir bildirib ki, referi FİFA-nın hakimlər üçün təşkil etdiyi seminarda iştirak etmək məqsədilə şənbə günü İstanbuldan Mayamiyə yollanıb. Lakin ABŞ-a çatdıqdan dərhal sonra sərhəddən geri qaytarılıb və bazar günü yenidən Türkiyəyə dönmək məcburiyyətində qalıb.

Allbanaadir nəşrinin yaydığı məlumata görə, nazirlik rəsmisi tətbiq olunan bu qadağanı kəskin pisləyib: “Ömər Artan Afrikanın ən hörmətli hakimlərindən biridir və bütün qlobal futbol ictimaiyyətinin dəstəyinə layiqdir. Onun ABŞ-a buraxılmaması və mundial matçlarını idarə etmək hüququndan məhrum edilməsi təkcə referinin karyerasına vurulan fərdi zərbə deyil. Bu qərar, eyni zamanda futbolun təməl prinsipləri olan dürüstlük, qaydalara hörmət və ədalətli oyun ruhuna kölgə salır”.