Gürcüstanın Qori şəhərində böyüklər arasında cüdo üzrə Avropa Kuboku start götürüb. Yarışın ilk günü Azərbaycan millisi üçün məhsuldar keçib. 18 ölkədən 191 idmançının qatıldığı turnirdə ölkəmiz geniş heyətlə — ümumilikdə 24 cüdoçu (18 kişi, 3 qadın) ilə təmsil olunur.

Turnirin ilk günündə tatami üzərinə çıxan 16 təmsilçimizdən 5-i fəxri kürsüyə qalxmağı bacarıb. Xüsusilə 66 kq çəki dərəcəsində idmançılarımızın mütləq üstünlüyü diqqət çəkib. Belə ki, bu çəkidə final görüşü “Azərbaycan derbisi”nə səhnə olub: həlledici qarşılaşmada Elşən Əsədovdan üstün olan İslam Rəhimov qızıl medala sahib çıxıb. E.Əsədov isə yarışı gümüş mükafatla tamamlayıb.

Komandamızın aktivinə bürünc medalları isə Babarrəhim Mirzəyev (60 kq), Nizami İmranov (66 kq) və Rüfət Şovlatov (73 kq) yazdırıblar. Beləliklə, cüdoçularımız yarışın startında 1 qızıl, 1 gümüş və 3 bürünc medal qazanaraq ümidləri doğruldublar.

Yarışın ilk günündə Məhəmməd Məmişov, Şamo Hüseynov, Murad Muradlı (60 kq), Zahir Ağazadə, Nazir Talıbov, Yaşar Nəcəfov (66 kq), Nadir İmanov, Nəriman Mirzəyev, Eltun İmranov, Bəhram Qurbanlı (73 kq) və qadınların mübarizəsində Mədinə Qaysinova (+78 kq) da qüvvəsini sınayıblar. Avropa Kubokuna sabah keçiriləcək ağır çəkili idmançıların qarşılaşmaları ilə yekun vurulacaq.