ABŞ-ın müstəqilliyinin 250 illik yubileyi və DÇ-2026-nın gərgin günlərində Rusiya Prezidenti Vladimir Putin amerikalı həmkarı Donald Trampa zəng edib. Rəsmi Kremldən yayılan təbrik məktubunun ardınca baş tutan və 85 dəqiqə davam edən qeyri-rəsmi telefon danışığında Ukraynadakı cəbhə xətti ilə yanaşı, ABŞ-ın ev sahibliyi etdiyi dünya çempionatı da müzakirə olunub.

Trampın FİFA-ya təşəkküründən sonra yeni siyasi jest

Xatırladaq ki, bu zəng ABŞ millisinin hücumçusu Folarin Baloqunun qalmaqallı şəkildə cəzadan qurtulması və Trampın buna görə FİFA-ya sosial şəbəkədə təşəkkür etməsindən sonraya təsadüf edir. Kremlin müşaviri Yuri Uşakovun TASS agentliyinə verdiyi məlumata görə, Putin söhbət zamanı Rusiyanın DÇ-2018-dəki təşkilatçılıq təcrübəsini xatırladaraq cari turnirin uğurla davam etməsini arzulayıb və ABŞ yığmasının mundialdakı çıxışına toxunub.

Rusiya üçün həssas mövzu

Futbol mövzusu Ukraynaya hərbi müdaxilə səbəbindən 2022-ci ildən bəri FİFA və UEFA turnirlərindən kənarlaşdırılan Rusiya üçün kifayət qədər həssasdır. Bu sanksiyalara görə Avro-2024 və DÇ-2026-nı buraxmaq məcburiyyətində qalan Rusiya, 2018-ci ildə ev sahibliyi etdiyi mundialda 1/4 finala qədər yüksələ bilmişdi.

Cari çempionatda isə ev sahiblərinin taleyi fərqli formalaşır. Digər təşkilatçı Kanada qrup mərhələsində Mərakeşə 0:3 hesabı ilə uduzaraq turnirlə vaxtından əvvəl vidalaşıb. Mübarizəni davam etdirən digər iki ev sahibindən Meksika 1/8 finalda İngiltərə ilə qarşılaşacağı halda, Ağ Evin və Trampın diqqət mərkəzində olan ABŞ millisi Belçika səddini keçməyə çalışacaq.