Norveç millisinin 35 yaşlı qapıçısı Eryan Nyuland dünya çempionatları tarixində penalti dəf edən 35-ci qolkiper kimi tarixə düşüb.

Ümumilikdə, bu günə qədər mundiallarda təyin olunan 285 penaltidən 229-u (80,4%) qolla nəticələnib. Reallaşdırıla bilməyən 56 zərbədən 38-i birbaşa qapıçıların seyvi sayəsində boşa çıxıb.

Dünya çempionatlarında yalnız dörd qapıçı iki dəfə penalti qaytarmağı bacarıb: Bred Fridel (ABŞ), İker Kasilyas (İspaniya), Yan Tomaşevski və Voysex Şensnı (hər ikisi Polşa).

Komanda hesabında isə penalti seyvlərinə görə Polşa (4 dəfə), İspaniya, ABŞ və Fransa (hər biri 3 dəfə) liderlik edir.

Buna baxmayaraq, braziliyalılar Nyulandın qapısına yol tapa biliblər — Neymar mundiallarda özünün 3-cü penalti qoluna imza atıb (bundan əvvəl DÇ-2014 və DÇ-2022-də fərqlənmişdi).

İngiltərə – Meksika matçında isə ingilislərin kapitanı Harri Keyn 11 metrlik cərimə zərbəsini dəqiq yerinə yetirib. Bu, Keynin dünya çempionatlarında penaltidən vurduğu 6-cı qol olub. Təcrübəli hücumçu bu göstərici ilə mundiallar tarixinin ən yaxşı penaltiçisi statusunu daha da möhkəmləndirib.