2025-ci il Afrika Millətlər Kuboku (AMK) böyük sensasiyalar olmadan başa çatdı. Finala qədər irəliləyən hər iki komanda – həm Seneqal, həm də Mərakeş üçün bu qələbə tarixi əhəmiyyət daşıyırdı. “Atlas şirləri” bu kuboku cəmi bir dəfə, o da uzaq 1978-ci ildə qazanmışdılar. “Teranqa şirləri” isə qitə birinciliyini kifayət qədər yaxın keçmişdə (2021-ci ildə) əldə etsələr də, bu, ölkə tarixinin yeganə zəfəri idi.
Avropalılar Afrika Kubokuna adətən yuxarıdan aşağı baxırlar. Futbol ictimaiyyətində AMK-nın səviyyəsinin aşağı olması və turnirin yalnız təşkilatçılıq xaosu ilə yadda qaldığına dair müəyyən stereotiplər mövcuddur. Bu yanaşma tam ədalətli olmasa da, 2025-ci il turnirində oyunun tamaşaçı zövqünü oxşaması ilə bağlı ciddi suallar yarandı. Hətta ən güclü hücum xəttinə malik komandalar belə, qol epizodu yaratmaqda çətinlik çəkirdilər.
Dramatik sonluq və qalmaqallı dəqiqələr
Olduqca sönük keçən final matçı tarixin tozlu səhifələrində itib-bata bilərdi, ancaq 89-cu dəqiqədən etibarən meydanda əsl triller yaşanmağa başladı. Əvvəlcə rəqiblər qarşılıqlı hücumlarla oyuna rəng qatdılar. Bir neçə dəqiqə sonra isə Rabatdakı azarkeşlərin ürəyi ağzına gəldi: “Teranqa şirləri” künc zərbəsindən qol vurdu. Diufun ötürməsini tamamlayan Cekson, qapı çərçivəsindən dönən topu təkrar zərbə ilə tora göndərdi.
Lakin matçın hakimi hücum zamanı Həkimiyə qarşı olduqca şübhəli bir fol qeydə alaraq qolu ləğv etdi. Seneqallılar bu qərarla barışıb psixoloji olaraq əlavə vaxta hazırlaşarkən, 90+5-ci dəqiqədə bütün stadion şoka düşdü. Hakim Mərakeşin xeyrinə penalti təyin etdi. Brahim Diasın qazandığı bu penalti, ləğv edilən qoldakı epizoddan daha mübahisəli və haqsız görünürdü.
Seneqal meydanı tərk edir!
Bu məqamda futbol tarixində nadir rast gəlinən hadisə baş verdi. Qonaqların baş məşqçisi Malik Çau hakim qərarına o qədər qəzəbləndi ki, komandanı meydandan çıxardı! Təxminən 5-7 dəqiqə ərzində meydanda qeyri-müəyyənlik hökm sürdü. Nəhayət, Sadio Mane komanda yoldaşlarını geri qayıtmağa razı saldı. Mane futbolçuları inandırmaq üçün hətta paltardəyişmə otağına gedən tunelə qədər getməli oldu.
Seneqal meydana geri dönsə də, gərginlik pik həddə idi. Qalmaqal fonunda Mərakeşin penalti yerinə yetirməli olduğu sanki unudulmuşdu. VAR-a baxdıqdan sonra da qərarını dəyişməyən hakim, topu “nöqtə”yə qoydurdu. AMK-2025-in ən yaxşı bombardiri Brahim Dias topun başına keçdi. Lakin onun üzərindəki təzyiq dözülməz idi.
Dias topa yaxınlaşdı və riskli “Panenka” zərbəsini yoxladı… Lakin qol olmadı! Qapıçı Mendi yerindən tərpənməyərək topu rahatlıqla tutdu. Hər kəs “Real”ın ulduzunun “fair-play” naminə bilərəkdən belə etdiyini düşünsə də, Diasın hönkürtü ilə ağlaması hər şeyi izah edirdi.
Əlavə vaxt və Seneqalın zəfəri
Hakim, əsas vaxtı bitirərək oyunu əlavə vaxta daşıdı. Bu dəqiqələrdə Seneqalın psixoloji üstünlüyü açıq-aydın hiss olunurdu. Ev sahibləri penalti uğursuzluğundan ayıla bilmədilər və bu, 94-cü dəqiqədə fəlakətlə nəticələndi. El-Aynaui dayaq zonasında topu itirdi, Seneqal isə sürətli əks-hücumla Bunu-nun qapısına yol tapdı. Qeye topu sol cinahla irəlilədib Papa Quyeyə ötürdü, o isə Həkimini üstələyərək topu sağ “doqquzluğa” mismarladı: 1:0!
Mərakeşlilər yalnız 10 dəqiqə sonra özlərinə gələ bildilər. Ancaq onların bütün cəhdləri nəticəsiz qaldı. Seneqal bu dramatik, qalmaqallı və gərgin finalda layiqli qələbə qazanaraq qitənin ən nüfuzlu kubokunu başı üzərinə qaldırdı.