Futbol tarixi unudulmaz matçlarından birini yaşadı. DÇ-2026-nın bürünc medal uğrunda keçirilən qarşılaşmasında İngiltərə millisi Fransanı 6:4 hesabı ilə məğlub edərək dünya üçüncüsü oldu. FİFA matçın dərhal ardından bəyanat yayaraq, “Üç aslan”ın son 60 ildəki ən böyük uğuruna diqqət çəkib.
Görüş inanılmaz ssenarisi ilə yadda qaldı. İlk hissədən sonra İngiltərə 4:0 hesabı ilə öndə idi və elə görünürdü ki, bürünc medalın taleyi artıq həll olunub. Lakin fasilədən sonra sürətli hücumlar quran Didye Deşamın yetirmələri göz qırpımında 3 qol vuraraq fərqi minimuma endirdilər. Fransızlar hesabı bərabərləşdirmək üçün daha bir neçə real qol şansını isə boşa verdilər.
Yekunda bu 10 qollu trillerdən 6:4 hesablı qələbə ilə ayrılan İngiltərə bürünc medalı bayram etdi. Futbolçuların motivasiya baxımından çox vaxt kölgədə qoyduğu və ləğv edilməsi təklif olunan bu “təsəlli finalı” gözlənilənlərin əksinə, unudulmaz şouya çevrildi.
ABŞ, Kanada və Meksikanın ortaq ev sahibliyi etdiyi turnirin bu kiçik finalına FİFA da biganə qalmadı və rəsmi təbrik mesajı yayımladı: “İngiltərəni DÇ-2026-nın üçüncüsü olması münasibətilə təbrik edirik”.
İngiltərə Futbol Assosiasiyası isə tarixi bir detalı önə çıxarıb: Şənbə günü qazanılan bu bürünc medal ingilislərin son 60 ildəki ən yaxşı nəticəsidir. Belə ki, komanda sonuncu dəfə 1966-cı ildə vətəndə dünya çempionu olmuş və həmin tarixdən bəri mundiallarda heç bir medal qazana bilməmişdi.
Dünya kuboku, 3-cü yer uğrunda oyun
Fransa – İngiltərə 4:6
Qollar: Rays, 3 (0:1). Konsa, 18 (0:2). Saka, 37 (0:3). Saka, 45+1 (0:4). Mbappe, 48 (1:4). Barkolya, 54 (2:4). Mbappe, 66 (3:4). Saka, 87-pen. (3:5). Dembele, 90+6 (4:5). Bellingem, 90+8 (4:6)
Hakim: Jesus Valensuela (Venesuela)
Fransa: Menyan, Konate (Din, 46), Lakrua, Ernandes (Upamekano, 46), Qyusto (Kunde, 90), Rabyo, Zair-Emeri, Şerki (Dembele, 46), Due (Barkolya, 46), Olise, Mbappe
İngiltərə: Henderson, Konsa, Gehi (Çaloba, 90), Kuansa (Ceyms, 83), Spens, Rays, Rocers, Eze (Anderson, 79), Saka, Reşford (Uotkins, 46), Toni (Bellingem, 79)
Stadion: “Hard Rock” stadionu (Mayami)