Fransa millisinin baş məşqçisi Didye Deşam DÇ-2026 üçün nəzərdə tutulan 26 nəfərlik heyəti elan edib. Tanınmış ulduzların siyahıdan çıxarılması və gözlənilməz gənc oyunçuların dəvət alması futbol ictimaiyyəti tərəfindən şokla qarşılanıb.
Heyətdə ən böyük rezonans doğuran məqam qapıçı seçimi olub. Uzun müddətdir Fransanın ‘1 nömrəli’ ümidi hesab edilən Lukas Şevalyenin siyahıdan kənarda qalması şok effekti yaradıb. PSJ-də əsas heyətdə rusiyalı qolkiper Matvey Safonovun kölgəsində qalan gənc əlcək sahibinin əvəzinə, Deşam Liqa 1-in ən yaxşısı seçilən 21 yaşlı Robin Risserə güvənib. Milli komandada hələ debüt etməyən Risserin birbaşa mundiala aparılması turnirin ən böyük sensasiyalarından biri hesab olunur.
Deşamın seçimində ən sərt gedişlər yarımmüdafiə və hücum xəttində hiss olunub. “Real”ın ulduzu Eduardo Kamavinqa və “Tottenhem”in hücumçusu Randal Kolo Muani rəqabətə qurban verilərək heyətdən kənarda qalıblar.
Zədəli Uqo Ekitikeni Jan-Filipp Mateta əvəzləyəcək, müdafiənin mərkəzində isə az təcrübəli Maksens Lakrua mundial həyəcanı yaşayacaq. Hücumun liderləri isə dəyişməzdir: kapitan Kilian Mbappe və “Qızıl top”un son sahibi Usman Dembele.
Dünya çempionatının əsas favoritlərindən sayılan Fransa millisinin Amerikadakı çətin marafonu üçün geri sayım başlayıb. İraq, Norveç və Seneqal ilə eyni qrupda yer alan “mavilər”, mundialdakı ilk ciddi sınağına iyunun 16-da İst-Raterfordda çıxacaqlar. Deşamın yetirmələri açılış matçında Seneqal səddini keçərək turnirə inamlı start vermək niyyətindədir.
Mundial öncəsi komandanın son vəziyyətini yoxlamaq üçün fransızlar iki mühüm yoldaşlıq görüşü keçirəcəklər. İyunun 4-də Nantda Kot d`İvarla, dörd gün sonar isə Lilldə Şimali İrlandiya ilə qarşılaşacaqlar.
Fransa milli komandasının DÇ-2026 üçün heyət:
Müdafiəçilər: Lukas Din (“Aston Villa”), Malo Qusto (“Çelsi”), Lukas Ernandes (PSJ), Teo Ernandes (“Əl-Hilal”), İbrahima Konate (“Liverpul”), Maksens Lakrua (“Kristal Pelas”), Jül Kunde (“Barselona”), Vilyam Saliba (“Arsenal”), Dayo Upamekano (“Bavariya”).
Yarımmüdafiəçilər: N’Qolo Kante (“Fənərbaxça”), Manu Kone (“Roma”), Adrien Rabio (“Milan”), Orelien Çuameni (“Real”), Uorren Zair-Emeri (PSJ)
Hücumçular: Maqnes Akliuş (“Monako”), Bredli Barkola (PSJ), Rayan Şerki (“Mançester Siti”), Usman Dembele (PSJ), Dezire Due (PSJ), Kilian Mbappe (“Real”), Jan-Filipp Mateta (“Kristal Pelas”), Maykl Olise (“Bavariya”), Markus Türam (“İnter”).