FIFA-nın sabiq prezidenti Yozef Blatter DÇ-2026-da ətrafında böyük qalmaqal yaşanan ABŞ millisinin hücumçusu Folarin Baloqunun cəzasının ləğv edilməsinə sərt reaksiya verib.
Baloqunun Bosniya və Herseqovina ilə matçda (2:0) aldığı qırmızı vərəqənin ali futbol qurumu tərəfindən qəfil ləğv edilməsi idman ictimaiyyətində böyük narazılıq doğurub. Mövzu ilə bağlı “X” sosial şəbəkə hesabında paylaşım edən 90 yaşlı isveçrəli funksioner, FIFA-nın mövcud rəhbərliyini rəzil addımda ittiham edib: “Qırmızı vərəqələr siyasi zənglərlə ləğv edilmir. Onları qaydalar, sübutlar və müstəqil orqanlar ləğv edir. Əgər ABŞ prezidenti FIFA prezidentinin işinə müdaxilə edirsə və oyunçu pley-off matçı öncəsi qəfil bəraət alırsa, bir sual qaçılmazdır: Quo vadis (Hara gedirsən), FIFA? Futbol heç vaxt siyasi güclərin oyun meydançasına çevrilməməlidir”.
Yozef Blatter 1998-2015-ci illərdə FIFA-ya rəhbərlik edib. O, qurum daxilindəki beynəlxalq korrupsiya şəbəkəsi, rüşvət qalmaqalları və yaxın ətrafının həbsi ilə bağlı yaranan güclü təzyiqlərdən sonra istefa vermək məcburiyyətində qalmışdı.