Rumıniyanın paytaxtı Buxarestdə keçirilən sürətli şahmat (rapid) üzrə Qran-Pri turniri başa çatıb. 581 şahmatçının mübarizə apardığı nüfuzlu yarışda Azərbaycanı Rauf Məmmədov və Aydın Süleymanlı təmsil ediblər.
İsveçrə sistemi üzrə 10 turdan ibarət olan turnirdə gənc qrossmeysterimiz Aydın Süleymanlı parlaq çıxış nümayiş etdirib. O, mümkün 10 xaldan 8,5 xal toplayaraq turnirin lideri ilə eyni nəticəni göstərib. Yalnız əlavə göstəricilərə görə qalibdən cüzi fərqlə geri qalan Süleymanlı fəxri kürsünün ikinci pilləsinə yüksəlib.
Turnir təmsilçilərimiz üçün yüksək nəticələrlə yadda qalıb: gümüş medal qazanan Aydın Süleymanlı ilə yanaşı, Rauf Məmmədov da 8 xal toplayaraq yarışı 7-ci pillədə tamamlayıb.
Turnirin qalibi isə Meksika təmsilçisi Xose Eduardo Martinez Alkantara olub.
Qeyd edək ki, 600-ə yaxın iştirakçının qatıldığı belə genişmiqyaslı turnirdə hər iki şahmatçımızın ilk onluqda qərarlaşması ölkə şahmat məktəbinin növbəti uğuru kimi qiymətləndirilir.
Show quoted text