UEFA Rusiyaya tətbiq edilən sanksiyaların müddətini uzadıb. 2026/27 mövsümündə nə bu ölkənin klubları, nə də milli komandası UEFA və FİFA bayrağı altında keçirilən beynəlxalq turnirlərə buraxılmayacaq. Bununla da Rusiya komandaları üst-üstə 5-ci mövsümdür ki, Çempionlar Liqası və digər avrokuboklardan təcrid olunurlar.
Qərarı təsdiqləyən UEFA prezidenti Aleksander Çeferin Ukraynadakı müharibə başa çatmayana qədər rusiyalı futbolçuların beynəlxalq arenaya qayıtmasının mümkün olmadığını bildirib. Bununla belə, sloveniyalı funksioner gənc idmançıların fürsətdən məhrum olunmasına görə təəssüfləndiyini də gizlətməyib: «Müharibə bitənə qədər onlar geri qayıtmayacaqlar. Rusiyalı idmançıların dörd ildir beynəlxalq yarışlardan kənarda qalması müəyyən mənada kədərlidir, lakin hazırda başqa çıxış yolu yoxdur. Ən yaxşı həll yolu müharibəyə son qoyulması və gənc istedadlara şans verilməsidir».
Qeyd edək ki, Beynəlxalq Olimpiya Komitəsi (BOK) və Beynəlxalq Voleybol Federasiyası (FIVB) sanksiyaları qismən yumşaldaraq Rusiyanı voleybol reytinqinə bərpa etsə də (baxmayaraq ki, 2027-ci ildə Polşada keçiriləcək dünya çempionatında iştiraklarına icazə verilməyəcək), UEFA və FİFA futbol məsələsində prinsipial mövqeyini dəyişməyib.