“Neftçi”nin Birləşmiş Ərəb Əmirliklərinin Əbu-Dabi şəhərində keçirilən qış təlim-məşq toplanışı çərçivəsindəki sonuncu yoldaşlıq görüşünün vaxtı bəlli olub.

Bakı təmsilçisi sabah Çinin “Çendu Ronqsenq” klubu ilə qarşılaşacaq. Görüş Bakı vaxtı ilə saat 17:00-da start götürəcək. Paytaxt klubu Əbu-Dabidəki əvvəlki yoxlama oyunlarında Qazaxıstanın “Kayrat” komandasına qalib gəlib (3:0) və Misirin “Pyramids” klubu ilə heç-heçə (1:1) edib.

Yuri Vernidubun yetirmələri bu gün növbəti məşqinə çıxıb. Komandanın orta xətt oyunçusu Sessi D’Almeyda artıq komandaya qoşulub. Benin millisinin heyətində Afrika Millətlər Kubokunda mübarizə aparan futbolçunun qayıdışı, Yuri Vernidub üçün əlavə güc deməkdir. D’Almeyda bu gün keçirilən məşqlərdə artıq əsas qrupla birlikdə iştirak edib.

Bu oyun “Neftçi” üçün Premyer Liqanın ikinci dövrəsinə hazırlıq mərhələsinin final sınağı olacaq. Yuri Vernidubun bu matçda əsasən taktiki sxemləri sonuncu dəfə yoxlayacaq.