Mbappe, Olise, Dembele və Barkolya kimi hücumçuların, cinahlardan sürətlə qoşulan Kunde və Dinin, mərkəzdə isə hər qarış üçün döyüşən Kone-Rabio duetinin yer aldığı Fransa heyəti istənilən müdafiəçi üçün 90 dəqiqəlik kabusdur. Əslində, 1/8 finalda bu təzyiqi Almaniya yaşamalı idi, lakin onlar Paraqvaya uduzaraq Deşamın “buxar maşını” ilə qarşılaşmaqdan xilas oldular.
Digər tərəfdən, Fransa da 1/4 final yolunda İsveç və Paraqvay səddini keçməyin bu qədər ağır başa gələcəyini gözləmirdi. Paraqvayın baş məşqçisi Qustavo Alfaro yenə klassik “avtobus” taktikasına sadiq qalmışdı. Almaniyaya qarşı mükəmməl işləyən — 10 nəfərlə topun arxasına keçib əks-hücumla qələbə gətirən bu müdafiə planı indi fransızları sınağa çəkirdi.
Bu dəfə mənzərə fərqli idi: Paraqvay mərkəz xəttini nadir hallarda keçsə də, öz yarısında intizamı əldən vermirdi. Topu rəqibə verən komanda hakimin gözündən qaçan xırda folları, gizli zərbələr və təxribatlarla (Qalarsanın Mbappeyə qarşı kobudluğu kimi) matçın tempini aşağı salırdı. Meydanda gərginliyi yalnız Mbappe və Kaseresin təbəssümlərlə müşayiət olunan, zarafatyana ikili mübarizələri azaldırdı. Ümumilikdə isə Paraqvayın fransızları psixoloji gərginliyə sürükləyərək oyunun ritmini pozmaq planı tam işə yaradı. Nəticədə Deşamın komandası ilk 45 dəqiqədə heç bir təhlükəli vəziyyət yarada bilmədi və enerjisini əsasən hakim və rəqiblə mübahisələrə xərclədi. Bu, Fransanın cari mundialda üzləşdiyi ən sərt müqavimət idi.
Filadelfiyadakı 40 dərəcəlik boğucu istidə zaman irəlilədikcə bu müdafiə səddini qırmaq həm fiziki, həm də psixoloji baxımdan ağırlaşırdı. Bundan əlavə, baş hakim İlqiz Tantaşevin qərarları da Alfaronun yetirmələrinin lehinə işləyirdi. Özbək referinin Dueyə qarşı cərimə meydançasının həm daxilində, həm də xaricində edilən aşkar follara göz yumması böyük ehtimalla onun turnirlə vidalaşmasına səbəb olacaq.
Fransanı bu vəziyyətdən yalnız VAR xilas etdi. Təkrar görüntülərə baxan hakim Duenin dizinə endirilən zərbəni qeydə aldı və penalti təyin etdi. Lakin bu qərar meydanda əsl xaos yaratdı: Paraqvay futbolçularının bitməyən etirazları, təxribatları və 11 metrlik nöqtənin ot örtüyünü butsları ilə qazıb korlamaq cəhdləri matçın gərginliyini pik həddə çatdırdı.
Rəqibin diqqətini yayındırmaq üçün Dembele topu əlində saxlayarkən, kənarda sakitliyini qoruyub diqqətini cəmləyən Mbappe penalti zərbəsini dəqiq yerinə yetirdi. Bu qol Kilianın dünya çempionatları tarixində 19-cu, hazırkı mundialda isə 7-ci qolu kimi tarixə düşdü.
Hesabda önə keçdikdən sonra Fransa oyunu tamamilə nəzarətə götürdü. İlk dəfə müdafiədən çıxmaq məcburiyyətində qalan Paraqvay isə indi də hücum zonasında kobudluğa yol verirdi. Nəticədə Paraqvay turnirlə vidalaşsa da, Fransanı son qüvvəsinə qədər yormağı bacardı. Bu matç həm də ciddi bir xəbərdarlıq oldu: 1/4 finalda Mərakeşlə duel daha çətin keçəcək. Fransızlar həmin oyunda ilk saniyələrdən bütün sürətini işə salmalı və ən gözlənilməz ssenarilərə belə hazır olmalıdırlar.
DÇ-2026, 1/8 final
Paraqvay – Fransa 0:1
Qol: Mbappe, 70 (pen.)
Baş hakim: İlqiz Tantaşev (Özbəkistan)
Paraqvay: Hil, Velaskes, Alderete (Kanale, 58), Q. Qomes (Maurisiu, 71), Alonso, Kaseres, D. Qomes, Kubas, Qalarsa, Almiron (Avalos, 71), Ensiso (Kabalyero, 61).
Fransa: Menyan, Upamekano, Saliba, Din, Kunde, Kone, Rabio, Olise, Barkolya (Due, 61), Dembele (Şerki, 84), Mbappe.
Xəbərdarlıqlar: Barkolya (19), Kone (81), Olise (90).
Stadion: Lincoln Financial Field (Filadelfiya)