İspaniyalı azarkeşlərinin gözlədiyi xəbər nəhayət gəldi! “Buğalar”ın gənc ulduzu Lamin Yamal, yığmanın ABŞ-dakı düşərgəsinə qoşulduğu gündən bəri ilk dəfə komanda ilə birlikdə məşqlərə başlayıb.

Son bir neçə həftəni zədə səbəbindən yaşıl meydanlardan uzaq düşən 17 yaşlı futbolçunun DÇ-2026-nın ilk iki oyununu buraxacağı iddia olunurdu. Lakin İspaniya düşərgəsindən gələn xəbərlər bu narahatlığa son qoyub.

“The Athletic” nəşrinin rəsmi “X” hesabında yaydığı məlumata görə, “Barselona”nın vunderkindi artıq tam gücü ilə çalışır. Baş məşqçi Luis de la Fuente də gənc hücumçunun diz ardı vətərindəki zədəni tam sağaltdığını və ilk matça hazır olacağını təsdiqləyib.

İspaniya millisi mundialda ilk oyununu gələn həftənin bazar ertəsi Kabo-Verde yığmasına qarşı keçirəcək. “Buğalar”ın yer aldığı qrupda Uruqvay və Səudiyyə Ərəbistanı da mübarizə aparır.