Dünya Çempionatı tarixində ilk dəfə 48 komandanın iştirak etməsi, ümumilikdə 96 fərqli formanın təqdim olunması deməkdir. Lakin “The Athletic” nəşrinin jurnalistləri bütün bu rəngarəngliyin içindən turnirin ən bərbad iki formasını seçiblər. Siyahının lideri İsveçrə, ikinci pillədəki “sürpriz” isə Xorvatiyadır.

İsveçrə: “Yol tənzimləyicisi” formalı dizayn

İsveçrə millisinin həm ev, həm də səfər formaları kəskin tənqid hədəfinə çevrilib. Nəşrin ekspertləri komandanın səfər formasını belə şərh ediblər: “İsveçrənin hər iki formasının ölkə pasportundan ilhamlandığı deyilir. Bu onsuz da qəribə ideyadır, amma formaya baxanda adama elə gəlir ki, pasportların ekran rəng balansı korlanıb. Bu elə bir dəhşətli rəngdir ki, onu yalnız məktəb qarşısında uşaqların yolu keçməsinə kömək edən tənzimləyicilərin əynində görmək olar. Hətta onların da daha yaxşı forma tələb etmək hüququ var”.

Xorvatiya: İkonik şahmat lövhəsinin uğursuz eksperimenti

Siyahının ikinci pilləsi hər kəs üçün gözlənilməz olub. Çünki Xorvatiya millisi adətən turnirlərin ən estetik formalarına sahib olur. Lakin bu dəfə “Nike” şirkətinin yaradıcılıq cəhdi iflasa uğrayıb: “Eksperiment istəyini anlamaq olar, lakin Xorvatiyanın ikonik şahmat lövhəsi naxışı ilə oynamaq böyük riskdir və təəssüf ki, dizaynerlər bu dəfə balansı tamamilə pozublar. Damalar həddindən artıq kiçikdir, ortadakı o qəribə ağ zolaq isə elə təəssürat yaradır ki, sanki kimsə formanı telefonda redaktə etmək istəyib, yarıya çatanda bezib və eləcə ağ rənglə boyayıb keçib. Qətiyyən alınmayıb”.