Bu gün Premyer Liqada 29-cu tura start verilib. Turun açılış matçında Qubada yerləşən OİK stadionunda nominal ev sahibi “İmişli” ilə “Sumqayıt” qarşılaşıb. Görüşün ilk dəqiqələrindən təşəbbüsü ələ alan Saşa İliçin komandası hücumameyilli futbolu ilə diqqət çəkib. Hesab 34-cü dəqiqədə açılıb. Qonaqların legioneri Aleksandr Ramalinqom dəqiq zərbə ilə “Sumqayıt”ı önə keçirib.
İkinci hissədə “İmişli” oyunda tarazlığı bərpa etməyə çalışsa da, müdafiədəki boşluqlar qonaqların daha təhlükəli əks-hücumlar qurmasına şərait yaradıb. Qarşılaşmanın 66-cı dəqiqəsində Nikola Ninkoviç fərqi artırmaq şansını əldən verib – onun yerinə yetirdiyi penalti zərbəsini meydan sahiblərinin qapıçısı dəf etməyi bacarıb.
Buna baxmayaraq, “Sumqayıt” sona yaxın təzyiqi artırıb. 85-ci dəqiqədə səhnəyə yenidən Ramalinqom çıxıb. Hücumçu özünün və komandasının ikinci qolunu vuraraq matçın yekun nəticəsini müəyyənləşdirib – 0:2.
“İmişli” Jorje Kaşkilyanın rəhbərliyi altında sona qədər mübarizə aparsa da, Premyer Liqa təcrübəsi və fərdi ustalıq bu gün qonaqların tərəfində idi. Xüsusilə “Sumqayıt”ın orta sahədəki dominantlığı və Ramalinqomun effektivliyi qələbədə həlledici rol oynadı.
İMİŞLİ – SUMQAYIT 0:2 (0:1)
Qollar: Ramalinqom, 34; Ramalinqom, 85
Baş hakim: Elçin Məsiyev
“İmişli”: Hüseynəli Quliyev, Azər Salahlı (k), İdris İnqilablı, Yau Mozes, Nikola Karaklayiç (Xəzər Mahmudov, 74), Ronaldo Rodriqes (Rafael Vieqas, 46), Dioqu Rollo, Juninyo, Edvin Banquera, Dioqu Kardozu, Mehdi Tağırov (Vüsal Qənbərov, 87).
“Sumqayıt”: Xəyal Fərzullayev, Höccət Haqverdi (Keffel, 60), Rüstəm Əhmədzadə (Ronaldo Vaskes, 75), Nihat Əhmədzadə, Səbuhi Abdullazadə (k) (Nikola Ninkoviç, 60), Rayan Senhaci, Emil Mustafayev (Sedrik Badolo, 75), Aleksandr Ramalinqom, Masaki Murata, Aleksa Yankoviç, Danilo Beskorovaynı.
Sarı vərəqələr: Beskorovaynı, 5. Murata, 39. Karaklayiç, 39. Vieqas, 64.
Qaçırılan penalti: Ninkoviç (66, qapıçı).