Dünya futbolunun əfsanəsi Dieqo Armando Maradonanın ölümü ilə bağlı Argentina məhkəməsində davam edən prosesdə sensasiyalı faktlar üzə çıxıb. San-İsidro Cinayət Məhkəməsində keçirilən iclasda futbolçunu müalicə edən həkimlər Maradonanın səhhəti ilə bağlı kritik məlumatlar paylaşıblar.

Məhkəmə qarşısına çıxan iki həkimin ifadəsinə görə, Maradona vəfatından qısa müddət əvvəl yüksək qan təzyiqi əleyhinə olan dərmanların qəbulunu dayandırıb. Mütəxəssislər qeyd ediblər ki, ciddi ürək xəstəliklərindən əziyyət çəkən sabiq futbolçunun bu addımı onun vəziyyətinin kəskin pisləşməsinə birbaşa təsir göstərə bilərdi.

Lakin prokurorluq tərəfi hadisələrə tamamilə fərqli rakursdan yanaşır. İttihama əsasən, futbolçunun mövcud xroniki xəstəlikləri tibbi komanda tərəfindən diqqətdən kənarda saxlanılıb. İstintaq materiallarında evdə müalicənin lazımi standartlara cavab vermədiyi, xəstənin vəziyyəti ağırlaşdığı halda tibbi müdaxilənin vaxtında edilmədiyi xüsusi vurğulanır.

İttihamçı tərəfin kəskin bəyanatı: “Tibbi heyət əfsanəvi ulduzu faktiki olaraq köməksiz vəziyyətdə qoyaraq, öz xidməti vəzifələrini yerinə yetirməyib.”

Hazırda davam edən məhkəmə prosesində 7 tibb işçisi “ehtiyatsızlıqdan adam öldürmə” ittihamı ilə mühakimə olunur. Onların arasında Maradonanın şəxsi neyrocərrahı Leopoldo Luke, psixiatrı Aqustina Kosaçov, həmçinin tibb bacıları və koordinasiya işlərinə məsul şəxslər yer alır. Məhkəmənin əsas diqqət mərkəzində olan sual budur: Maradonanın ölümünün qarşısını almaq mümkün idimi?

Futbol tarixinin ən böyük simalarından biri olan Dieqo Maradona, 25 noyabr 2020-ci ildə Buenos-Ayres əyalətinin Tiqre şəhərində vəfat edib. Rəsmi tibbi rəyə əsasən, ölümün səbəbi “xroniki ürək çatışmazlığı nəticəsində yaranan kəskin ağciyər ödemi” kimi qeyd olunub.