“Qəbələ”nin baş məşqçisi Kaxaber Tsxadadze Misli Premyer Liqasının 30-cu turu çərçivəsində keçirilən “Zirə” ilə matçdan (0:1) sonra fikirlərini bölüşüb. Təcrübəli mütəxəssis məğlubiyyəti şərh edərək, komandasının oyunundakı əsas çatışmazlıqlara toxunub.

Tsxadadze ilk növbədə rəqibi qələbə münasibətilə təbrik edib: “İlk olaraq “Zirə”ni qələbə münasibətilə təbrik edirəm. Rəşad Sadıqov uzun müddətdir bu kollektivlə çalışır və kifayət qədər yaxşı komanda formalaşdırıb”.

Matça ciddi hazırlaşdıqlarını vurğulayan baş məşqçi, realizasiya problemlərindən şikayətlənib: “Oyuna hazırlığımız yüksək səviyyədə idi. Meydanda qol epizodları yaratsaq da, son nöqtəni qoymaqda çətinlik çəkirdik. Təəssüf ki, bu, bizim ən böyük problemimizdir. Üstəlik, yenə çox sadə bir qol buraxdıq. Əslində həmin epizoda qədər rəqibin real qol şansı, demək olar ki, yox idi”.

Tsxadadze sonda stadiona gələn azarkeşlərə də müraciət edib: “Bu gün tribunada çoxlu azarkeş var idi. Onları qələbə ilə sevindirə bilmədiyimiz üçün böyük təəssüf hissi keçirirəm”.