“Qəbələ”nin baş məşqçisi Kaxaber Tsxadadze Misli Premyer Liqanın 28-ci turunda “Sumqayıt”a məğlubiyyətdən (0:1) sonra fikirlərini bölüşüb. Gürcü mütəxəssis komandasının qol şanslarını boşa verməsindən gileylənib: “Hər şey göz qabağında idi – oyun boyu böyük üstünlüyə sahib idik. Sadəcə, yaradılan qol epizodlarını reallaşdıra bilmədik. Futbolun yazılmamış qanunudur: qol vurmasan, qalib gələ bilməzsən. İki dəfə boş qapı qarşısında fürsəti əldən verdik. Bunun səbəbini bilmirəm, görünür, futbolçularımıza soyuqqanlılıq çatışmır”.

Tsxadadze komandanın elitada qalmaq uğrunda mübarizəsini davam etdirəcəyini vurğulayıb və azarkeşlərə müraciət edib: “Premyer Liqada qalmaq üçün əlimizdən gələn hər şeyi edəcəyik. Azarkeşlərimizə təşəkkür edirəm; uğursuz nəticələrə baxmayaraq, bizi hər zaman dəstəkləyirlər. Bu məğlubiyyətə görə onlardan üzr istəyirik”.