DÇ-2026-nın qrup mərhələsinin növbəti oyununda İsveçrə Bosniya və Herseqovinanı 4:1 hesabı ilə məğlub edərək növbəti mərhələyə vəsiqəni böyük ölçüdə təmin etdi. Hesabında 4 xalı və yaxşı top fərqi olan “helvetlər” qrupda sonuncu yerə düşmək təhlükəsindən demək olar ki, uzaqdırlar. Hətta son matçda Kanadaya böyük hesabla uduzub 3-cü yerə ensələr belə, ən yaxşı qrup üçüncülərindən biri kimi pley-offa yüksəlmək şansları həddindən artıq yüksəkdir. Bosniyalılar isə mərhələ adlamaq üçün son turda mütləq Qətərə qalib gəlməlidirlər.
Xatırladaq ki, hər iki komanda turnirə 1:1 hesablı heç-heçə ilə başlamışdı. Lakin Kanada ilə xalları bölüşən Bosniya və Herseqovinadan fərqli olaraq, Qətər qarşısında böyük üstünlüyü əldən verib son saniyələrdə qol buraxan İsveçrə üçün həmin nəticə böyük məyusluq olmuşdu.
Görüşün ilk yarısı olduqca aşağı tempdə və darıxdırıcı ssenari ilə keçdi. İsveçrə topa sahib olma nisbətində böyük üstünlüyə malik olsa da, real qol vəziyyətləri yarada bilmədi.
İkinci hissədə də oyun bərabər səviyyədə davam etsə də, baş məşqçisi Murat Yakinin 72-ci dəqiqədə etdiyi üçlü əvəzləmə həll edici oldu. Meydana daxil olan “Frayburq”un gənc istedadı Yohan Manzambi cəmi iki dəqiqə sonra – 74-cü dəqiqədə akrobatik zərbə ilə hesabı açdı. 80-ci dəqiqədə bosniyalı Tarik Muharemoviç cərimə meydançasının həndəvərində Bril Emboloya qarşı kobudluğa görə birbaşa qırmızı vərəqə ilə meydandan qovuldu. Say üstünlüyü qazanan isveçrəlilər rəqibi dərhal cəzalandırdı: 84-cü dəqiqədə Embolonun ötürməsini oyuna sonradan daxil olan Ruben Varqas qola çevirdi. Daha sonra Varqasın ötürməsi ilə Manzambi yaxın məsafədən dublunu rəsmiləşdirdi. Bosniyalılar təslim olmadılar. Meydana yenicə daxil olan Ermin Mahmiç qapıçı Qreqor Kobelin səhfindən maksimum yararlanaraq uzaq məsafədən hesabdakı fərqi azaltdı. Son saniyələrdə Amar Memiç cərimə meydançasında qaydanı pozdu. Təyin olunan penaltini Qranit Caka dəqiq yerinə yetirərək yekun hesabı müəyyənləşdirdi.
Dünya Kuboku, B qrupu, 2-ci tur
İsveçrə – Bosniya 4:1
Los-Anceles. “Sou-Fay” stadionu. 70026 tamaşaçı.
Hakim: Joao Pineyru (Portuqaliya)
İsveçrə: Kobel, Vidmer (Jakue, 86), Elvedi, Akanji, Rodriqes, Ebişer (Sou, 71), Caka, Froyler, Rider (Varqas, 71), Embolo (İtten, 89), Ndoye (Manzambi, 71).
Bosniya: Vasiliy, Kolaşinaç, Muharemoviç, Katiç, Dediç, K. Alajbeqoviç (Mamiç, 90), Sunyiç (Hacıahmetoviç, 86), Tahiroviç (Başiç, 63), Memiç, Ceko (Bayraktareviç, 64), Demiroviç (Lukiç, 86).
Qollar: Manzambi, 74; 90. Varqas, 84. Caka, 90+7 – Mamiç, 90+3.
Sarı vərəqələr: Dediç, 59. Ceko, 61. Elvedi, 65.
Qırmızı vərəqə: Muharemoviç, 80.