AFP-nin məlumatına görə, çərşənbə axşamı minlərlə etirazçı Meksikada keçiriləcək mundialın açılış mərasiminə və turnirin ilk matçına ev sahibliyi edəcək «Azteka» stadionuna gedən əsas magistral yolu bağlayıb. Xatırladaq ki, cümə axşamı stadionda Meksika və Cənubi Afrika yığmaları qarşılaşmalıdır.

CNTE üzvü olan müəllimlərin bir həftədir davam edən etiraz aksiyaları səngimir. Onlar maaşların artırılmasını və hökumətin qeyri-real hesab etdiyi pensiya islahatı qanun layihəsinin qəbulunu tələb edirlər. Yaranmış vəziyyətlə bağlı polis stadion ətrafında genişmiqyaslı təhlükəsizlik tədbirləri görüb, yollara beton sədlər düzərək etirazçıların arenaya yaxınlaşmasının qarşısını alıb.

Etirazçı Anxel Vilyalobos vəziyyəti belə şərh edib: «Biz stadiona daxil olmaq istəyirik. Hökumətin təklif etdiyi həll yolları bizi qane etmir».

Meksika prezidenti Klaudiya Şeynbauum baş verənləri təxribat kimi qiymətləndirib və mundial ilə bağlı obyektlərə ziyan vurulması və yolların bağlanması yolverilməz olduğunu bildirib: «Lakin mən polisin zorakılıq tətbiq etməsinə icazə verməyəcəyəm. Buna baxmayaraq, əminliklə bildirirəm ki, çempionatın açılış mərasimi yüksək səviyyədə, sabit və təhlükəsiz şəraitdə baş tutacaq».

Qeyd edək ki, ABŞ, Kanada və Meksikanın birgə ev sahibliyi etdiyi Dünya Çempionatı iyulun 19-dək davam edəcək.