UEFA prezidenti Aleksander Çeferinin 2026-cı il dünya çempionatının genişləndirilmiş formatı ilə bağlı fikirləri Asiya, Afrika və Karib hövzəsi ölkələrində ciddi narazılıq yaradıb.
“Zurnal 24″ün məlumatına görə, Çeferin iştirakçı sayının 48-ə çatdırılmasının maraqsız oyunların çoxalmasına səbəb olacağını iddia edib. Bu açıqlama Kabo-Verde, Konqo DR, Kürasao, Haiti, İordaniya və Özbəkistan futbol federasiyalarının kəskin reaksiyasına səbəb olub.
Məsələyə münasibət bildirən federasiyalar yaydıqları birgə bəyanatda futbolun yalnız məhdud dairədəki elit ölkələrin mülkü olmadığını, oyunun əsl gücünün məhz onun universallığında gizləndiyini vurğulayıblar. Qeyd olunub ki, dünya çempionatında iştirak etmək bir çox xalqlar üçün ən böyük idman nailiyyətidir və bu, yeni nəsil futbolçuları ilhamlandıran əsas amildir.
Bəyanat müəllifləri turnirə vəsiqə qazanmağın Kabo-Verde, Kürasao, İordaniya və Özbəkistan üçün tarixi bir uğur olduğunu, Konqo DR və Haiti üçün isə onilliklər sonra dünya futbolunun ən böyük səhnəsinə möhtəşəm qayıdış mənası daşıdığını xüsusi olaraq diqqətə çatdırıblar.