Premyer Liqasının növbəti turunda “Qəbələ” doğma meydanda autsayder “Karvan-Yevlax”ı qəbul edib. Hər iki komandanın turnir cədvəlindəki vəziyyəti bu qarşılaşmanı prinsipial etsə də, 90 dəqiqənin sonunda qalib müəyyənləşməyib. Oyunun 26-cı dəqiqəsində qonaqlar İmani Barkerin qolu ilə hesabı açaraq “Qəbələ”ni şoka salıblar. Meydan sahibləri bu qola cəmi 10 dəqiqə sonra reaksiya verə biliblər. 36-cı dəqiqədə təyin olunan penaltini Seydina Keyta dəqiq yerinə yetirərək tarazlığı bərpa edib.
Kaxaber Sxadadzenin yetirmələri son 5 oyunda cəmi 2 xal qazanaraq uğursuz seriya keçirirdilər. Cədvəlin sonuncusu olan “Karvan-Yevlax”la oyun bu seriyanı qırmaq üçün əla fürsət olsa da, “qırmızı-qaralar” qələbə topunu vura bilməyiblər.
Yevlax təmsilçisi dekabr ayından bəri ilk xalını qazansa da, Füzuli Məmmədovun komandası hələ də avqust ayından bəri qələbə üzünə həsrətdir. “Qəbələ” isə bu bərabərliklə azarkeşlərini növbəti dəfə məyus edib və xal itkilərini davam etdirib.
QƏBƏLƏ – KARVAN-YEVLAX 1:1 (1:1)
Qollar: İmani Barker, 26 (0:1); Seydina Keyta, 36-pen. (1:1)
Baş hakim: Kamal Umudlu.
“Qəbələ”: Sallahat Ağayev, Murad Musayev (k), Turan Manafov, Eşqin Əhmədov, Seydina Keyta, Adriel Ba Lua (Şahin Şahniyarov, 67), Xayme Syerra, Sambu Sissoko (İsmahil Akinade, 33), Prins Ovusu, Domi Massumo, İsaak Amoa.
“Karvan– Yevlax”: Pedro Mateuş, Vadim Abdullayev, Rauf Rüstəmli (İbrahim Qədirzadə, 90+2), Elvin Yunuszadə (k), Emin Rüstəmov, Coy-Sleyd Mikkels (Samir Abdullayev, 90+1), Şakil Sno (Vüsal Məsimov, 90+1), Kayl Spens (Piter Kinqs, 86), Moyze Ngvisani, Qavi Tompson (Uğur Cahangirov, 74), İmani Barker.Sarı vərəqələr: Mateuş, 35. Tompson, 45. Rüstəmov, 45+1.