Seneqal milli komandasının və “Əl-Nəsr”in ulduz vingeri Sadio Mane, Afrika Millətlər Kubokunun (AMK) Mərakeşlə keçirilən final matçındakı qalmaqallı anlara aydınlıq gətirib. Təcrübəli futbolçu, komanda yoldaşlarının etiraz əlaməti olaraq meydanı tərk etmək cəhdinin qarşısını niyə aldığını izah edib.

Final qarşılaşmasında Seneqalın qapısına təyin olunan penaltidən sonra gərginlik pik həddə çatıb və futbolçular etiraz olaraq soyunub-geyinmə otağına yönəliblər. Hadisənin gedişatını dəyişən Mane həmin anları belə xatırlayır: “Bu, kollektiv şəkildə verilmiş bir qərar idi. Komanda yoldaşlarım meydanı tərk etmək istəyirdilər. Lakin mən onları geri qaytardım və bildirdim ki, oyunu mütləq sona çatdırmalıyıq”.

Ulduz futbolçu komanda yoldaşlarının etirazına niyə qoşulmadığını və hansı məsuliyyəti hiss etdiyini bu sözlərlə ifadə edib: “Bizim kimi hakimlər də səhv edə bilər – onları mühakimə etmək bizə düşməz. Mən bunu hər şeydən əvvəl dünyada bu matçı izləyən və futboldan zövq almaq istəyən azarkeşlər üçün etdim. İnsanlar skandalları yox, futbolu görməli idilər. Oyunu yarıda kəsmək ədalətsizlik olardı. Qalib gəlməyimizdən və ya məğlub olmağımızdan asılı olmayaraq, görüşü ləyaqətlə başa vurmaq vacib idi” – deyə Mane DAZN-a müsahibəsində bildirib.

Qeyd edək ki, bu çempionluqla Sadio Mane Seneqal yığması ilə birlikdə karyerasında ikinci dəfə Afrika Millətlər Kubokunun baş mükafatına sahib çıxıb. “Liverpul”un keçmiş ulduzu ilk zəfərini 2022-ci ildə qazanmışdı. Manenin bu soyuqqanlı addımı komandasını qaçılmaz texniki məğlubiyyətdən xilas etməklə yanaşı, həm də idman dünyasında böyük rəğbətlə qarşılanıb.