“Zadəganlar”ın yeni baş məşqçisini qətiyyən “taktika qurmanı” adlandırmaq olmaz, lakin o, işin digər aspektlərində olduqca güclüdür…

Cari ilin 8 yanvar tarixində “Çelsi” növbəti yeni məşqçisini qarşıladı. Hələ Roman Abramoviç dövründən tez-tez məşqçi dəyişməsi ilə tanınan London klubu, bu “ənənəni” amerikalı sahiblər Todd Boeli və Behdad Eqbali ilə də davam etdirir. Bu dəfə Entso Mareskanın yerinə, daha əvvəl londonluların “qardaş klubu” olan Fransanın “Strasburq” komandasında çalışan 41 yaşlı Liam Rosenyor gətirildi.

Britaniya mediasının verdiyi məlumata görə, “Çelsi”nin əsas komandası ilə cəmi bir həftədən bir az çox vaxt keçirən yeni mütəxəssis həm futbol ekspertlərini, həm də “mavilər”in çoxsaylı azarkeşlərini kifayət qədər təəccübləndirməyi bacarıb.

Gəlin, kiçik bir tapmaca ilə başlayaq: Siz harada Koul Palmer və Ris Ceymsin bir otaqda oturub birlikdə LEGO konstruktoru yığdıqlarını görə bilərsiniz? Cavab variantlarını məhdudlaşdırmaq üçün iki versiya təqdim edirik: a) Heç yerdə, bu sadəcə kiminsə zarafatıdır; b) “Çelsi”nin yeni baş məşqçisi Liam Rosenyorun rəhbərliyi altında keçirilən məşqdə.

İkinci variantın doğruluğuna inananları alqışlamaq olar. Həqiqətən də, Liam Rosenyorun “Çelsi”yə gətirdiyi yenilənmiş məşq proqramı London klubunun oyunçularının öyrəşdiyi metodlardan köklü surətdə fərqlənir.