Tacikistanın paytaxtı Düşənbə şəhərində keçirilən cüdo üzrə “Böyük Dəbilqə” turniri başa çatmaq üzrədir. Yarışın son günündə ölkəmizin ağır çəkili pəhləvanları uğurlu çıxışları ilə diqqət mərkəzinə düşüblər.

+100 kq çəki dərəcəsində çıxış edən hər iki cüdoçumuz bütün rəqiblərini məğlub edərək yarımfinal mərhələsinə yüksəliblər. Turnirə inamlı start verən Uşanqi Kokauri, ilk görüşündə iranlı rəqibi Məhəmmədpuria Banayan Tolkini üstələyib. Dörddəbir finalda Rumıniya təmsilçisi Darius Dobreni mübarizədən kənarlaşdıran təcrübəli idmançımız adını yarımfinala yazdırıb. O, finala gedən yolda polşalı Yakub Sordil ilə qarşılaşacaq.

Digər təmsilçimiz Camal Qamzatxanov da komanda yoldaşından geri qalmayıb. O, startda Yovan Pekoviçi (Monteneqro), növbəti mərhələdə isə çinli Hayanq Lini məğlub edərək yarımfinala vəsiqə qazanıb. Qamzatxanovun final yolundakı rəqibi rusiyalı Bislan Katamardov olacaq.

Xatırladaq ki, hazırda millimizin aktivində bir medal var. Turnirin əvvəlki günlərində Rəşid Məmmədəliyev (73 kq) bürünc medala sahib çıxaraq komandamızın hesabına ilk mükafatı yazdırıb.