“Əl-Nəsr”in kapitanı Kriştiano Ronaldo klubun transfer siyasətinə və idarəçilik sisteminə etiraz olaraq şok qərar verib. Portuqaliyalı ulduz komandanın növbəti matçına çıxmaqdan imtina edir.
Səudiyyə Ərəbistanı Pro Liqasında sular durulmur. Dünyanın diqqət mərkəzində olan “Əl-Nəsr” klubu ciddi daxili böhranla üz-üzədir. Komandanın əsas siması Kriştiano Ronaldonun 20-ci turda “Əl-Riyad”a qarşı keçiriləcək görüşdə iştirak etməyəcəyi bildirilir. Lakin bu dəfə səbəb nə zədə, nə də yorğunluqdur.
Klub daxilindəki etibarlı mənbələrdən sızan məlumatlara görə, Ronaldo Səudiyyə Ərəbistanı Dövlət İnvestisiya Fondunun (PIF) maliyyə bölgüsündən kəskin narazıdır. İddia olunur ki, 39 yaşlı hücumçu “Əl-Nəsr”in rəqibləri olan “Əl-Hilal” və “Əl-İttihad”la müqayisədə kifayət qədər dəstək görmədiyini düşünür.
Xüsusilə, baş məşqçi Xorxe Jesusun təkidlə istədiyi ulduz transferlərin reallaşmaması və qış keçid dövründə yalnız gənc iraqlı futbolçu Heydər Əbdülkərimlə kifayətlənilməsi Ronaldonun səbr kasasını daşıran son damla olub.
Ronaldonu qəzəbləndirən digər məqam isə əzəli rəqib “Əl-Hilal”ın transfer bazarındakı hegemonluğudur. “Göylər”in Pablo Mari və Kader Meyte kimi oyunçular üçün ayırdığı nəhəng büdcə, üstəlik Kərim Benzemanın “Əl-İttihad”dan “Əl-Hilal”a keçəcəyi ilə bağlı gəzən söz-söhbətlər “Əl-Nəsr” kapitanında klubun gələcəyinə dair ciddi şübhələr yaradıb.
Klubun daxilindəki qeyri-müəyyənlik təkcə yaşıl meydanlarla məhdudlaşmır. Ayın əvvəlində idman direktoru Simau Kutinyo və baş direktor Joze Semedonun rəhbərlik tərəfindən uzaqlaşdırılması idarəçilik boşluğu yaradıb. Ronaldo hesab edir ki, bu cür qeyri-peşəkar mühitdə çempionluq qazanmaq qeyri-mümkündür.
Xatırladaq ki, yanvarda komandanın sükanı arxasında olan Xorxe Jesusun “Əl-Nəsr rəqibləri kimi siyasi nüfuza malik deyil” ifadəsi böyük qalmaqala səbəb olmuşdu. Ronaldonun bugünkü “boykot” qərarı, əslində, bu iddianın meydanlardakı əks-sədası kimi qiymətləndirilir.
İndi bütün dünya bu suala cavab axtarır: Rəhbərlik Ronaldonu geri dönməyə razı sala biləcək, yoxsa bu, portuqaliyalı əfsanənin Səudiyyə macərasının sonunun başlanğıcıdır?