Ölkənin iki ən titullu və köklü klubu – “Neftçi” ilə “Qarabağ” Premyer Liqada bir çox məqama aydınlıq gətirəcək ardıcıl iki oyun öncəsi birgə bəyanatla çıxış ediblər.

Aprelin 26-da 29-cu tur, aprelin 30-da isə 21-ci turun təxirə salınmış oyunu çərçivəsində baş tutacaq bu “duellər” təkcə turnir cədvəli üçün deyil, həm də ölkə futbolunun imici üçün böyük əhəmiyyət kəsb edir.

Klubların yaydığı birgə bəyanatda ilk diqqət çəkən məqam azarkeş marağıdır. Artıq satışa çıxarılan biletlərin böyük hissəsinin tükənməsi tribunalarda möhtəşəm bir atmosferin olacağından xəbər verir. Bu, sadəcə iki komandanın mübarizəsi deyil, futbolun cəmiyyəti birləşdirmə gücünün növbəti nümayişidir.

“Neftçi” və “Qarabağ” arasındakı rəqabət 35 ilə yaxındır ki, Azərbaycan futbolunun onurğa sütununu təşkil edir. Bu illər ərzində biz meydanda dramatik dönüşlərin, dünya səviyyəli qolların və bitmək bilməyən bir əzmkarlığın şahidi olmuşuq. Klubların bəyanatında bu tarixə toxunulması təsadüfi deyil, bu, keçmişə hörmət və gələcəyə məsuliyyət mesajıdır: “Bu rəqabət illərdir ki, mediamızın və futbol ictimaiyyətinin diqqət mərkəzindədir. İnanırıq ki, qarşıdakı iki oyun da öz keyfiyyəti ilə bu şanlı tarixə yeni və parlaq səhifələr yazacaq”.

Məqalənin bəlkə də ən vacib mesajı “Fair-Play” prinsipləridir. Klublar  azarkeşlərinə səslənərək onları sivil dəstək nümayiş etdirməyə çağırıblar. Bəyanatda vurğulanan əsas məqam budur: Mübarizə fitin sədası ilə başlamalı və fitin sədası ilə də meydanda bitməlidir.

Hər iki klubun rəsmi mövqeyi birdir: gərgin idman mübarizəsi dostluq və qarşılıqlı hörmət kölgəsində keçməlidir. “Neftçi” və “Qarabağ”ın bu birgə addımı ölkədə futbol mədəniyyətinin yüksəlməsinə xidmət edən təqdirəlayiq bir jestdir.

Aprelin sonunda bizi sadəcə 180 dəqiqəlik futbol yox, əsl xarakterlər savaşı və idman bayramı gözləyir. Bəyanatın sonunda qeyd olunduğu kimi: Qoy bu gərgin mübarizədən ilk növbədə Azərbaycan futbolu qalib ayrılsin!