“Tvente” üçün mövsümün uğursuz startı hazırda Niderland idman gündəminin əsas müzakirə mövzusudur. Nüfuzlu “TwenteInsite” nəşrinin məlumatına görə, “Ferensvaroş”a məğlub olaraq Avropa Liqası ilə vidalaşan “tukkerlər”, “Qarabağ” səddini keçə bilməyəcəkləri təqdirdə Konfrans Liqasından da kənarda qalacaqlar.

Məşhur “KickOff” podkastında çıxış edən tanınmış idman jurnalistləri Valentin Drissen və Mayk Vervey “Tvente”də idarəetmə və baş məşqçi postundakı vəziyyəti sərt tənqid ediblər.

Drissen komandadakı enişi qaçılmaz hesab etdiyini bildirib: “Əlbəttə, hər şey tərsinə gedəcək. Xüsusilə də Con van den Brom üçün vəziyyət çətindir. Onu sadəcə qurban verirlər. Özü də gedəcəyini deyə bilərdi, amma bunu da etmir”.

Mayk Vervey isə uğursuzluqda klubun texniki direktoru Erik ten Haqın qərarlarını xüsusi vurğulayıb: “Təəccüblü olan odur ki, ictimai rəyin və Con van den Bromun ötən mövsümkü nəticələrinin təzyiqi altında Erik ten Haq onu postunda saxlamaq qərarına gəldi. Görünür, bu addım tam bir fəlakətlə nəticələnir. Çünki hər bir texniki direktor öz baş məşqçisini təyin etməyə üstünlük verir.

Bəlkə də o zaman rəhbərlik belə deməli idi: ‘Təşəkkür edirik, fantastik iş gördünüz. Sizə ömürlük abunə bileti veririk, amma biz fərqli mütəxəssislə yola davam edəcəyik’. Yekunda bu, Ten Haq üçün də ən yaxşı ssenari olardı. Çünki indi onun da nüfuzuna xələl gəlir və proses Van den Brom üçün çox xoşagəlməz bir hekayəyə çevrilir”.

Niderlandlı jurnalistlər “Tvente”nin “Qarabağ”la qarşıdakı həlledici matçına da toxunublar. Mütəxəssislərin fikrincə, Ağdam təmsilçisi Niderland klubu üçün böyük başağrısı ola bilər.

V. Drissen: “Hər şey yenə də onlar üçün nisbətən yaxşı nəticələnə bilər. Lakin nəzərə almaq lazımdır ki, ‘Qarabağ’ bəlkə də Avropanın ən üst elitasına aid deyil, amma kifayət qədər keyfiyyətli futbolçulara malikdir. Onlar bir neçə dəfə çətin vəziyyətlərdən asanlıqla çıxmağı bacarıblar”.

M. Vervey: “Şərtlər heç də asan deyil. ‘Tvente’ ötən mərhələdə evdə 6:1 hesabı ilə qalib gəlmişdi, bəlkə də məhz buna görə irəli gedə bildilər. Amma səfər oyunları çox bərbad idi – 3:3 hesablı heç-heçəni xatırlayaq. Məndə heç də ‘Tvente’nin yaxşı formada olduğu təəssüratı yaranmır”.Xatırladaq ki, 2026-cı ilin yazında Ten Haq, ictimaiyyətin təzyiqi fonunda Van den Bromun başa çatan müqaviləsini daha bir mövsüm uzatmaq qərarına gəlmişdi. Lakin hazırkı “Tvente” ötən mövsümkü komandanın sadəcə kölgəsidir. Keçən il mütəmadi olaraq qol epizodları yaradan komanda, hazırda hücum xəttində ciddi qısırlıq yaşayır.