“Sabah”la yollarını ayıran nigeriyalı hücumçu Cessi Sekidika “Instagram” səhifəsində azarkeşlərə və kluba vida mesajı ünvanlayıb.

Paytaxt təmsilçisindəki üç illik fəaliyyətini yüksək qiymətləndirən 29 yaşlı forvard duyğularını belə ifadə edib: “Sabah“dakı hekayəmin sonuna çatdıq. Bura böyük ümidlər və ambisiyalarla gəlmişdim. Bu gün isə qəlbim minnətdarlıq hissi və heç vaxt silinməyəcək xatirələrlə doludur. Biz birlikdə inanılmaz anlar yaşadıq, çətin sınaqlardan keçdik və klub tarixinə düşən uğurlara imza atdıq. Qazandığım üç titulla qürur duyuram, lakin mənim üçün ən böyük dəyər burada qazandığım dostluqlar və səmimi münasibətlərdir”.

Sekidika klubun heyətinə, məşqçilər korpusuna və azarkeşlərə xüsusi təşəkkürünü bildirib: “Komanda yoldaşlarıma, məşqçilərimə, klub rəhbərliyinə və bu yolda əməyi keçən hər kəsə təşəkkür edirəm. İlk gündən mənə sevgi və dəstək göstərən azarkeşlərə xüsusi minnətdaram. “Sabah” tarixinin bir hissəsi olmaq mənim üçün böyük şərəf idi. Kluba gələcək fəaliyyətində uğurlar arzulayıram. Hər şey üçün təşəkkürlər, “Sabah”!”

Qeyd edək ki, Cessi Sekidika “Sabah”da keçirdiyi üç mövsümdə komandanın hücum xəttindəki əsas fiqurlardan biri olub.