Aprelin 20-də Braziliyanın Fos-du-İquasu şəhərində boks üzrə Dünya Kuboku start götürür. Turnirin əsas özəlliyi onun lisenziya xarakterli olmasıdır ki, bu da yarışın əhəmiyyətini və rəqabət səviyyəsini qat-qat artırır.
Azərbaycan Boks Federasiyasından (ABF) verilən məlumata görə, mötəbər turnirdə ölkəmizi həm kişi, həm də qadınlardan ibarət milli komandalar təmsil edəcək.
Rinqə çıxacaq əsas heyətdə Sübhan Məmmədov (50 kq), Zidan Günbətov (55 kq), Məhəmmədəli Aşirəliyev (60 kq), Nəbi İsgəndərov (70 kq), Seyidcamşid Cəfərov (75 kq) və Məhəmməd Abdullayev (+90 kq) yer alıb.
Qadınların yarışında isə iki idmançımız – Zeynəb Rəhimova (54 kq) və Emili Rzayeva (65 kq) qüvvəsini sınayacaq.